O TELEFÉRICO
Como ben saberedes, estase a falar moito un suposto proxecto para a construción dun teleférico que una o centro urbano coa Cidade da Cultura. O certo é que polo que nós sabemos é unha idea que pouco ten de concreto e ainda menos dun estudo e planificación da súa sostibilidade, impacto ou alternativas.
Sobre o teleférico que iría polo parque de Belvís, a Xunta directiva da A.V. A Xuntanza, recollendo o sentir de moitos socios e socias e as súas reflexións, fixo pública hai xa un ano a súa posición sobre o asunto que foi comunicada á UNESCO e ao Concello e, publicitada á veciñanza ao longo de todos estes meses.
Estamos en contra dese proxecto polas seguintes razóns:
- O parque de Belvís é un espazo básico do lecer e a sociabilidade dos nosos veciños e veciñas aínda que, a día de hoxe, é un proxecto en construción …Cremos necesario e imprescindible finalizar o parque antes de iniciar obras e remodelacións innecesarias.
- Por outra banda, a estación de pasaxeiros do teleférico situaríase na zona máis ao Norte do parque, nas inmediacións do edificio coñecido como “Casa do Matadoiro”. Alí hai un parque infantil -un dos dous con que conta o barrio- e unha pradeira na que tradicionalmente ten lugar unha romaría ou comida campestre de toda a veciñanza durante as festas patronais do barrio. A instalación da estación obrigaría a resituar tanto o parque como esta actividade festiva; posiblemente, a romaría deixaría de celebrarse aquí, xa que a orografía do parque impide a súa celebración noutro lugar.
- Ademais, a estación de pasaxeiros tería o seu acceso principal para peóns e vehículos pola Praza do Matadoiro/Porta do Camiño. O noso barrio e, máis concretamente toda esa zona, sofre neste momento unha importante sobrecarga de tráfico, tanto rodado como peonil… todo ese tramo, así como a Rúa de San Pedro, soportan densidades de tráfico que están entre as máis altas da cidade e moi próximas aos niveis de saturación. Instalar un novo foco de atracción de vehículos e persoas nesta zona parécenos, cando menos, unha temeridade, máxime se temos en conta que o proxecto do teleférico non conta neste momento con ningunha previsión de como canalizar ese tráfico de visitantes cara a e desde a estación de pasaxeiros.
- As nosas rúas están xusto enfronte da Cidade da Cultura e os seus campos, de feito, formaban parte do noso barrio ata que se construíron a vía do ferrocarril e a antiga estrada de circunvalación, hoxe Avda. de Lugo… propuxemos en repetidas ocasións ao goberno municipal e á Consellería de Cultura o desenvolvemento dun percorrido para peóns e ciclistas. O Parque de Belvís -moi accesible desde o casco histórico e a zona nova- remataría cunha pasarela peonil elevada que permitiría unha transición suave entre as distintas zonas da cidade.
A este posicionamento so temos que engadir hoxe algunhas dúbidas máis:
- ¿Como pode ser que se proxecte a construción dunha das estacións de pasaxeiros no campo de futbol que imos arranxar dentro do programa Urbana Santiago Norte?
- ¿Ten que ver o estado de obra permanente que ten o Parque de Belvís con este proxecto?
- ¿E non sería mellor agardar a ter o famoso plan de mobilidade para a cidade antes de acometer proxectos relacionados con este asunto?
- ¿Qué alternativas se nos ofrecen para non perder o único equipamento deportivo do barrio?
Se queredes ler un resumo da carta enviada o ano pasado á Unesco onde se plantearon todos estes interrogantes, preme aquí.
Para ir preparando o ambiente das festas, a Asociación Veciñal A Xuntanza e a Asociación de comerciantes do barrio de San Pedro convídavos a participar nun obradoiro especial que terá como finalidade construír un belén. Aprenderemos a facer figuras, edificios e paisaxes a partir dalgúns refugallos cotiáns e materiais como fieltro, area, etc.
CURSIÑO DE INICIACIÓN AOS MALABARES.