A Xuntanza

Para poder ter unha mirada mais ampla organizamos xunto coa AV Fonseca un acto o próximo mércores 3 de Xuño ás 19:15h no auditorio do Museo do Pobo Galego, no que contaremos coas investigadoras da Rede Galabra presentado os resultados do seu último estudo de Turismo e Comunidadedes Locais

Vai un resumo do que pretendemos aconteza nesta xornada de reflexión.

Na tarde do día 3 de xuño de 2026, a partir das 19:15 horas, investigadoras da USC e da UVigo pertencentes à Rede Galabra van presentar no auditorio do Museo do Pobo Galego resultados dos traballos que veñen desenvolvendo sobre o perfil do turista desexado pola comunidade local e o comercio, en sentido amplo e en contraste coas expectativas e actitudes dos visitantes.

Trátase de abordar os efectos culturais e identitarios do turismo en Compostela e a conexión das narrativas relativas a Santiago coas prácticas e os consumos declarados polas persoas que visitan a cidade. Colocando o foco na visión da poboación local -tanto habitantes como comerciantes- en relación aos diversos impactos da actividade turística, pártese do conxunto de respostas colectado en traballo de campo realizado en 2023.

No encontro “Pulsar o corazón da (nosa) cidade : o turismo desexado” procúrase atender, a partir do enorme banco reunido mediante aplicación de moi extensos cuestionarios (con respostas de 914 habitantes, 444 comerciantes e 1948 visitantes), a preguntas como “que esperan -ou non queren- as persoas compostelás das visitantes?”, “que desexan as persoas visitantes en relación á comunidade local?” ou “cales son, para o comercio local, as clientes preferidas?”. Trátase de abandonar as suposicións ou afastar falsos mitos e, con apoio en datos robustos, facer unha aproximación ás interaccións reais entre espazo habitado, tecido económico e demanda externa en Santiago de Compostela.

Así, a exposición de algúns dos resultados das investigacións visa contribuír para a reflexión e o debate de actualidade sobre o modelo turístico e os impactos na comunidade local, no cadro do compromiso social investigador de Galabra e en modo de transferencia do coñecemento xerado á sociedade interesada e afectada pola pesquisa.

Para iso, serán expostos -entre outros datos de interese seleccionados para a ocasión- os seguintes resultados a destacar:

– a crecente visión crítica das persoas locais con respecto ao perfil das visitantes e e ás políticas públicas ligadas ao turismo (con independencia do grao de relación familiar cos beneficios derivados dese tipo de actividade);

– o contraste entre o manifesto interese (7,6 sobre 8 puntos) das visitantes para frecuentaren espazos usados polas residentes e o marcado desinterese (3,3 puntos sobre 8) ou falta de dispoñibilidade en relación á interlocución coa poboación santiaguesa;

– a enorme distancia, en termos de satisfacción, entre 94% de persoas foráneas satisfeitas coa visita e 52% de habitantes a declararen preferencia por outro tipo de turista (que resulta ben esclarecedora do desencontro ou ‘descamiño’).

O encontro, organizado polas asociacións veciñais compostelás Fonseca, da Zona Vella, e A Xuntanza, de San Pedro, xorde na secuencia de diversas actividades desenvolvidas xunto da comunidade local e con ela pola Rede Galabra e como resultado da cooperación e traballo conxunto que a Rede vén mantendo con estas entidades.

Somos unha cidade pequena, universal e aberta ao mundo pero tamén somos unha pequena comunidade que se preocupa polas súas persoas e polo patrimonio herdado. Queremos coidar á xente maior e miúda, parques nos que pasear, espazos de lecer, que os comedores escolares sexan gratuitos para quen o precise, que ninguén teña que durmir ao raso en inverno, que as pistas do rural estean ben asfaltadas e limpas, que as beirarrúas estean arranxadas… Queremos tamén dar o mellor de nós no coidado das rúas, casas e bens históricos que nos foron legados polas persoas que viviron aquí antes ca nós. Queremos ser quen de acoller como merecen ás persoas que por devoción, tradición, interese ou simple turismo ven a coñecer esta Compostela que tanto amamos.

Queremos moito. Aspiramos ao mellor e non pode ser doutro xeito.

Con todo, a realidade é que Santiago é unha cidade pequena que por fin agora chegou aos 100.000 habitantes e os cartos non chegan. Por isto reclamamos hai anos que as persoas que nos visitan contribúan a pagar os gastos que xeneran.

Nós tamén facemos iso cando visitamos cidades pequenas en calquera sitio de Europa pois todas temos o mesmo problema. E tamén pagamos nas grandes capitais (Paris, Milán, Roma, Londres), sempre de peto mais folgado.

Alguén nos pode explicar porqué non podemos aspirar a dar unha mellor acollida a quen nos visita? a poder ofrecer mellores servizos? ou a coidar o patrimonio que veñen coñecer?

Alguén pode explicalo? Até o de agora non tivemos resposta.

E isto todo son teorías, diredes. Sabedes que implica no noso cotiá que da bolsa común do noso concello saquemos cartos para a acollida turística?

• Que cando hai apuro na zona turística (case sempre agora de abril a outubro), o lixo queda sen recoller en Quiroga Palacios, Home Santo e mesmo ás veces en Concheiros.
• Que non temos autobuses que suban a rúa de Betanzos ou servizo razoable na liña 13, ou para ir ao Hospital de Conxo, pero hai unha morea de buses que van ao aeroporto, porque esta xente ten que coller o avión á súa hora.
• Que non hai taxis
• Que temos servizos como o subministro de auga ou a depuración que teñen que ter maior capacidade da que nos corresponde porque ás veces hai moooita xente mais. E iso hai que pagalo.
• Que gastamos un diñeiral cada ano no arranxo das lousas do centro histórico (nos barrios históricos, non) porque enormes camións cargados de todo entran cada día para dar comidas, bebidas, roupa de cama limpa, souvenires… a toda esa xente que nos visita.
• Por non falar de obras como a do Campo de Conxo ou Concheiros feitas a maior gloria de quen nos visita ás costas das necesidades da veciñanza.

Quen pode negar a evidencia de que o turismo ten un custe directo nos servizos que recibimos? Teñen algunha idea mellor para obter os cartos que necesitamos? Non pode ser que as vacacións dunhas persoas se fagan a costa dos servizos ás persoas maiores ou as becas de material escolar. En que mundo vivimos??

A veciñanza soporta ruidos, molestias e expulsión dos seus bens mais queridos e do seu legado, mantén os servizos municipais e ten unha actitude aberta e moi hospitalaria de cara a toda esa xentiña que ven a coñecer a nosa cidade. Que mais queren? Só pedimos unha pequena contribución a cada unha desas persoas que ven a Compostela.

Pensar doutro xeito é concordar con sacar cartos do arranxo de rúas, da María Miramontes ou do saneamento do rural para darllelo aos turistas. Queremos iso? Nós, non.

Que pensamos nós?

• Queremos unha taxa turística, xa.

• Queremos un órgano transparente con participación veciñal para xestionar ese recurso. Mellor o Consello Municipal de Turismo que calquera chiringuito novo que acabará sendo algo opaco e interesado.

• Que os cartos vaian á sufragar os gastos da actividade turistica. Porque non financiar dese peto a actividade de INCOLSA, que se dedica á promoción do turismo? Custa 2 millons e pico de euros ao ano así que teriamos 2 millons para comedores, baches, centros socioculturais, festas… o que queramos. É moito.

Agardamos que mañá no Pleno a cordura sexa a opinión maioritaria.

Temos un problema severo de desequilibrio da nosa vida coa actividade turística, non o empeoremos.

A reunión tivo lugar o xoves 3 á noitiña no Pazo de Raxoi e estiveron presentes a alcaldesa, Goretti Sanmartín e a tenente de alcaldesa María Rozas, as concelleiras e concelleiros Xan Duro, Xesús Domínguez, Pilar Lueiro, Iago Lestegás, así como persoal técnico do departamento de obras.

Foi un encontro solicitado pola nosa asociación para repasar o estado de diversos temas de interese para o barrio. Entregouse un documento con peticións, demandas e avisos detallados correspondentes ás áreas de Mobilidade, Plan Especial e Patrimonio histórico, Parques e Xardíns, Servizos comunitarios (limpeza, alumeado), Vivenda, Turismo e Obras. Foi unha listaxe completa de asuntos; por mor do tempo dispoñible, tratáronse con detalle aqueles mais urxentes ou importantes quedando para outros encontros os considerados de menor prioridade.

Área de Mobilidade

• Expresouse a necesidade de reformular e ampliar a zona de estacionamento residente do barrio, a revisión das tarxetas, vixilancia do cumprimento…
• A comunicación deficiente que temos por autobús cos hospitais.
• O repintado abusivo das prazas de aparcamento diante do Bosco.

Plan Especial

• O maltrato reiterado ao Cruceiro da Praza 8 de Marzo por parte do Concello, das terrazas e os bares, o servizo de limpeza e a falta de concienciación nos eventos que alí se realizan. É un dos cruceiros máis antigos de Galicia e está nun estado lamentable. Volvimos a entregar o informe de avaliación do seu estado que encargamos en 2012 para ver de que fagan algo.
• O estado lamentable e degradado que presenta esa praza non é admisible nun espazo monumental. Hai que reordeala e dignificala, se ao tempo se pode poñer en valor o cruceiro, mellor.
• Consultamos sobre unha posible actualización do Plan Especial para adaptalo aos tempos=> estanse facendo pequenos cambios, ao fío das necesidades -como é o caso dos que se fixeron agora- pero nada mais.
• Tamén preguntamos polo Plan de Xestión feito no tempo de Compostela Aberta, froito dun dialogo e reflexión social, que debería servir de guía para o manexo da zona histórica=> estase traballando na súa actualización, para telo á maior brevidade.
• Solicitamos por milmillonesima vez os informes das comisións asesoras (municipal ou da Xunta) que autorizaron o asfaltado das beirarrúas de Concheiros.

• É necesario ordenar as terrazas e controlar a concesión de licencias. Ter un negocio de hostelaría non pode implicar obrigadamente o dereito a instalar unha terraza na rúa, que é un espazo público, cando en moitos casos non se cumpren as condicións de espazo de almacenamento do mobiliario usándose de xeito constante as prazas como “almacéns”.
• Aínda que non é deste ramo, aproveitamos para comentar co concelleiro a necesidade de emprender accións de acompañamento para que as comunidades veciñais que o precisen acometan obras de rehabilitación e accesibilidade naqueles bloques de Quiroga Palacios, Home Santo ou Avda de Lugo. Nós vemos que é un xeito de sacar ao mercado vivendas hoxe baleiras por non ter ascensor ou ser antigas; necesitamos vivendas para a veciñanza.
• Tamén falamos da necesidade de controlar os pisos turísticos e todo iso=> están niso pero carecen de persoal suficiente para avanzar todo o rápido que queremos (nós e eles).

Servizos comunitarios

• Recollida de lixo na Costa do Vedor: a solución que dan é a mesma que explicaron en novembro. Trátase de instalar na parte baixa da rúa un semáforo que permita que o camión baixe sen perigo (en dirección contraria); queren conectalo á rede semafórica da Avda de Lugo así que hai que facer obra. Seica van aproveitar o cambio da rexilla que hai no medio da rúa e que van facer estes días para facer o apaño.
  • Actualización a día 15 de xullo: antes de fin de mes debería estar funcionando.
• Falamos tamén do pésimo servizo prestado pola concesionaria da limpeza: non recollida diaria (ás veces nin nas rúas principais), non varrido/baldeado das rúas, colectores cotrosos e rotos. => que van mirar de arranxar un pouco. Hai aberto un proceso de investigación á empresa para que faga o que está no contrato.
• Tamén comentamos a indignación polo estado lamentable da praza 8 de marzo, cos colectores degradados (noxentos) na rúa de San Pedro, os outros pechados, e unha ringleira deles colocados contra o muro. Seica o problema é que na rúa de San Pedro hai moitos bares e xa que logo, moito lixo e non hai onde meter os seus residuos (que tampouco separan nin botan nun horario normalizado) => entendemos que iso non xustifica a situación da zona por canto non é a veciñanza quen sobreproduce lixo e non separa. Solicitouse recollida porta a porta para negocios como no resto da cidade histórica, sensibilización para a hostalaría e ordenación e limpeza na praza.
• Solicitouse a instalación dun punto limpo movil nun emprazamento estable no barrio un día ao mes, claramente coñecido e sinalizado, pois non todo o mundo ten coche para subir ao Tambre, nin temos establecementos que recollan baterías e cousas así (malia a obriga que podan ter).
• Solicitamos colectores de orgánicos para Quiroga Palacios=> Van poñer 2.
• Explicamos tamén unha vez mais o deficiente alumeado da Avda de Lugo na zona arranxada pola Xunta e en Concheiros, así como nalgunhas zonas nas que se puxeron as novas luminarias=> van mirar e corrixir.

Parques e xardíns

• A degradación do Parque da Trisca é tan evidente que non a negaron; tampouco a necesidade dunha intervención integral que implique non só tarefas de mantemento senón tamén de seguridade, limpeza, comodidade… A alcaldesa, sabedora da situación, comparte a nosa sensación e premura; o concelleiro simplemente dixo que o parque era un dos incluídos no novo contrato de mantemento de parques que está en adxudicación. O que quere dicir iso xa o veremos porque ese contrato é para todos os parques da cidade e non deu confirmado que se teña prevista unha intervención específica para este parque que recentemente veñen de ter limpado un grupo de familias usuarias, para vergonza de todos os departamentos competentes.
• O parque de Belvis, malia aos pequenos arranxos recentes, está igualmente descoidado. A zona de xogos debería estar clausurada no seu estado actual por significar un risco para a seguridade das crianzas: non hai sombra (tala da figueira que sombreaba gran parte do parque infantil), mobiliario desgastado e deteriorado, a contorna das hortas a monte, non se sinaliza e non se puxo ningún dos pasamáns reiteradamente solicitados nas saidas cara a ruela das Fontiñas ou Belvís. Segundo o concelleiro está bastante ben, que xa puxeron luces e arranxaron algun muro; no resto vai á contrata de mantemento de Parques. O que ao noso ver é moi insuficiente.
• Preguntamos tamén pola desvalorización que se fai deste parque, que é un espazo histórico e ten un plan especial propio. Preguntamos pola autorización da Comisión para plantar árbores en zona arqueolóxica (na beira do regato): non houbo resposta. E algún comentario de que nón é preciso que pase por ningunha comisión asesora a pesar de ter un plan propio.
• Todo o de Belvís, de sempre, é penoso. Parece que quen goberna (antes e agora) só se lembra do parque para facer festas ou propoñer cousas que están fóra de lugar. Triste, a verdade.

Obras

• Explicáronnos o detalle das obras menores que se van facer na rúa de Betanzos (na inmediación do CEIP Apóstolo Santiago) e na Costa do Vedor (substituír unha rexilla que está estragada e mete moito ruído). Solicitamos, e se comprometeu o concelleiro, en reunirse cunha representación da ANPA do Apóstolo para explicar a intervención por canto afecta aos accesos ao centro.
• Preguntamos novamente polo estado administrativo da obra de Concheiros: agora mesmo está xudicializada. Isto quere dicir que non se pode facer nada mais que obras de mantemento e de reposición das cousas que se estragan. Como xa explicamos a este concelleiro no seu momento non ten sentido seguir metendo cartos nun proxecto que é algo fallido, que é un horror visual, climático e de seguridade; non responde a un criterio moderno nin ás necesidades do barrio.=> non agardamos mudanza de ningún tipo neste asunto, e tampouco compromiso para facerse cargo dunha solución.
• Solicitamos nese caso que se execute a parte comprometida polo Concello e que se instale o cadro eléctrico na terraza do miradoiro da Cruz de San Pedro. Debaixo do banco de pedra está -como pode ver calquera- o sitio cos cables para poñelo. Foi un compromiso da Xunta, do alcalde Bugallo e está preinstalado xa. É imprescindible para evitar as broncas de todos os anos sobre a dispoñibilización de puntos de luz na praza da Cruz o día da cacharela para poder traballar con seguridade esa noite e para poder ter un sitio no barrio onde poder enganchar un equipiño de son calquera entidade do barrio. É unha demanda antiga (lembrades o Barrio con Luz propia?) así que queremos que se materialice xa un punto eléctrico estable e seguro.
• No escrito entregado ía recollida á urxencia da reparación das beirarrúas de Fraguas, o corredor Rosario-Bonaval, ordenar á entrada ao colexio…

Chegou o momento!! Trae esas cousas que che sobran na casa ao Mercado do Caracol. Agora máis que nunca, que despois de tantas limpezas e ordenacións haberedes de ter material dabondo.

Soñas con renovar a túa mesiña de noite cunha lámpada resultona e eficiente? Gustaríache equipar mellor a túa cociña? Tes grandes proxectos para este curso e precisas accesorios deportivos?… Esta é a túa oportunidade.

Lembras esa cafeteira en perfecto estado que esmorece nun armario da túa casa? Esa lámpada que realmente nunca conseguiches encaixar na túa sala? E aqueles patíns tan lindos? A bici estatica-percheiro?… Fai inventario, simplifica a túa vida e trae contigo todas esas cousas pois aqui poderás vendelas, trocalas ou mesmo regalalas.

Que algunha das túas trapalladas é grande? Trae unha foto e poderás atopar quen o necesite.

Buscas… pero non sabes moi ben que? Leva a túa lista, porque nas nosas casas hai moitas cousas durmindo polas esquinas que mellor estarían noutro fogar.

 … e aínda poderás redescubrir unha zona do barrio e os seus establecementos comerciais. É o día perfecto para facer compras nos negocios desta rúa ou para tomar un bo almorzo.

A cita é o sábado 14 de xuño na Rúa do Home Santo, das 11h ás 14h.

Se queres vir e traer a túa casiña, lee con atención estas instrucións. O correo para anotarse é axuntanza01@gmail.com

Estade atentas ao noso Instagram e Facebook o día previo, por se houbese cambios debidos ao permiso do Concello ou a previsión do tempo.

O concello iniciará en breve (aló polo día 19 deste mes) as obras de modernización da rúa Puente la Reina. O pasado martes tivo lugar unha xuntanza de presentación do proxecto que será sinxelo pero que debería modificar para ben o estado actual da zona. As obras durarán arredor de 5 meses e terán un custe estimado de case 400.000 euros.

Os aspectos básicos da nova proposta son:

Os comentarios e preguntas das veciñas e veciños presentes foron principalmente arredor do ritmo das obras e da súa loxística así como da problemática do aparcamento. Resumimos as conclusións:

• Agás momentos moi puntuais, o acceso aos garaxes e vivendas estará garantido en todo o tempo que duren os traballos. Nun tempo esta obra e as que fai a Xunta no tunel de Batalla de Clavijo se solapan pero se tomarán medidas para que impacte o menos posible.

• A perda de prazas de aparcamento é inevitable pois o ancho actual da beirarrúa é insostible. Quedaron en buscar solucións e en revisar as cargas e descargas da zona e a conveniencia de que pasen a aparcamento normal (verde/branco) pois o movemento comercial nesta zona é limitado. Nós solicitamos que se habilite unha zona para esta veciñanza na avda de Lugo durante as obras.

• Houbo preguntas tamén polo porte e colocación das árbores, xa que algúns xa petan nas fiestras e polo xeral tapan a luz nunha rúa que por orientación xa non é moi luminosa.

• Hai unha problemática específica que é a dos edificios que teñen vivendas que nesta rúa quedan por debaixo do nivel da rúa pois algunhas delas teñen filtracións de auga en tempo de choiva desde a anterior remodelación da rúa. Responde o técnico presente que o concello non vai entrar niso pero que facilitará -se así se lle pide- que as comunidades fagan os traballos que precisen para instalar aislamentos aproveitando as escavacións.

O que nós pensamos:

• O aparcamento: a veciñanza ten razón en poñer sobre a mesa o problema da ausencia de opcións de aparcamento. Neste barrio, casa renovación de rúa supón a desaparición inmediata de prazas, de xeito que desde 2008 desapareceron arredor de 200 prazas; as dispoñibilizadas desde entón na Avda de Lugo e Altiboia non chegan a dúas ducias e non dan servizo á esa parte que queda aos dous lados do monte da Trisca (Belvís/Quiroga Palacios). Por iso aparcar en Belvis, Quiroga Palacios, Batalla de Clavijo, Bispo Teodomiro e Costa do Vedor é algo case imposible aínda que o coche necesario nunha cidade coma a nosa na que o transporte público funciona mal e nunha zona coma esta con poboación envellecida e mal servizo de autobuses.
• Se queremos menos coches nas rúas é inevitable que o concello planifique estacionamentos suficientes en barrios como o noso no que non hai estacionamento, nin público, nin privado, nin gratis, nin pagando; simplemente porque os edificios non teñen garaxes e porque non hai parcelas para aproveitar. Solucionar o tema do aparcamento é urxente porque a suba dos alugueiros xa nos castiga, porque o envellecemento dificulta a vida de moitas persoas que necesitan (elas ou quen coida) unha mobilidade áxil e porque nesta cidade o coche -ainda que estea parado 6 días á semana- continua sendo imprescindible e non pode ser outra vez motivo de expulsión de poboación. Propostas:
  • Un estacionamento baixo a Avda de Lugo que dea servizo a todo o barrio pero tamén ao Xulgado e ao futuro Imelga e posiblemente a algunha desa xente que vai vir traballar á Xunta.
  • Reestudiar o proxecto de construir un estacionamento na rúa do Canteiro, ben como equipamento grande ben como uso puntual dalgunhas fincas.
  • Avaliar o uso da avda de Lugo no noso lado como zona de estacionamento (parece que hai moito coche de longa duración) e incluila toda ela na nosa zona da ordenanza de estacionamento de residentes como zona verde/branca.
  • Entretanto, habilitar unha zona de aparcamento na rúa Brañas de Sar para a veciñanza destas rúas e dotar o túnel de acceso de Batalla de Clavijo de elementos que garantan a seguridade das persoas tamén de noite. E buscar a forma de que o aparcamento na rúa da Ameixaga sexa seguro para persoas e vehículos pois agora son frecuentes os roubos e ataques aos coches.

Sobre o proxecto:

• Solicitamos xa na xuntanza que se invistan algúns remanentes nun arranxo aínda que sexa superficial das escalinatas (polo menos limpeza de muros, reposición dos pavimentos e repintado dos pasamáns).

• E que se aproveite tamén para instalar pasamáns na costa de Batalla de Clavijo e se restaure o mobiliario de madeira desa rúa, que está destrozado. A idea é que todo o ambito debería quedar ben rematado, arranxado e dignificado.

• Solicitamos que se reavalíe o tipo de árbore a instalar, para que non sexan lesivos ás vivendas

• Imos pedir a instalación dalgún colector máis de orgánico. Se queremos que a xente separe hai que facilitalo e neste momento non hai ningún nin en Puente la Reina nin en Batalla de Clavijo.

Como é tradición, faremos un seguimento dos traballos e intentaremos negociar a incorporación das melloras que nos fagades chegar. Neste caso hai pouca marxe xa que coñecimos o proxecto esta semana xa con todo licitado pero entendemos que no posible tanto o concelleiro como o equipo técnico están abertos a incorporar todas as suxestións de mellora que sexa posible.

Eles e nós quedamos á vosa disposición para a resolución de dúbidas e incidencias.

Un documento con algunhas imaxes e os datos básicos da obra está na web do concello, ao fío da nota de prensa da xuntanza

Ben sabedes do difícil que é hoxe atopar unha vivenda a un prezo razoable, das subas dos alugueiros que expulsan á veciñanza, da impotencia e ansiedade por non atopar onte vivir… vivimos ou escoitamos esas experiencias todos os días.

Por este motivo, hai unhas semanas dimoslle unha volta ao tema pensando en propostas que puidesemos facer desde a propia cidade. O concello dentro das súas posibilidades e o tecido social e a veciñanza dentro das nosas para remediar ou polo menos para acompañar.

Compartimos con vós o documento que preparamos daquela e aproveitamos para convidarvos a participar na manifestación que terá lugar o próximo sábado 5 de abril:

Nos últimos anos asistimos a un incremento dos prezos de alugueiros e venta ao tempo que a unha cada vez menor oferta de vivendas residenciais nos nosos barrios. Algo que como asociación e veciñanza é unha das principais preocupacións pois impacta na participación cidadá, repercute negativamente no sostén da vida comunitaria e na humanización das nosas cidades como lugares vivos e activos. É unha preocupación que ven de vello e entendemos como ligada á crecente explotación da nosa cidade como produto (económico, turistico).

Para iso desde A Xuntanza vimos reflexionando e elaborando unha batería de achegas coas que participar do debate público sobre a Vivenda, unha problemática que nos atinxe a toda a cidadanía e da que todas debemos ser parte na procura de solucións. No noso barrio, este é un asunto primordial pois xogamos o futuro na nosa capacidade de manternos como comunidade; cada día vemos como persoas de todas as idades e condición son obrigadas a marchar. É insufrible e as medidas que se propoñen, lentas.

Por isto, queremos compartir as ideas que se nos ocurriron que poderían poñerse en marcha desde a nosa propia cidade pois no local, na nosa querida Compostela é posible avanzar noutra dirección.

Pensamos que é necesario:

• Forxar e fornecer alianzas co tecido social e asociativo. A situación actual do acceso á vivenda é un problema grave que afecta ou afectará á veciñanza a todos os niveis.
• Atender aos “desfiuzamentos” invisibles aos que se están a ver abocadas persoas na nosa contorna, que deben ser visibilizados e denunciados. Especialmente os que afectan a persoas cunha situación social ou económica vulnerable. As subas de alugueiro indiscriminado, a negación a reformas básicas polas persoas propietarias, a presenza no mercado de vivendas sen condicións de habitabilidade mínimas… provocan ditos “desfiuzamentos” e son tolerados polas administracións.
• Crear unha rede clara de apoio ás persoas ameazadas de expulsión do pais: que coñezan os seus dereitos, opcións e que se lles proporcionen recursos públicos para garantir os dereitos básicos.
• Crear apoios claros e específicos para as persoas vulnerables (familias, persoas maiores) que son expulsadas, precisan atopar vivenda ou actualizar a que habitan.
• Planificación óptima do transporte público, tendo en conta os traxectos reais que sustentan as vidas nos barrios e faciliten o uso a tódalas persoas que os habitan. A mobilidade (ou inmobilidade) é un castigo sobre o castigo da expulsión dun barrio, da vida nunha infravivenda, da incertidume sobre o alugueiro. Non pode seguir sendo así.
• Hai que facer un seguimento do estado actual das vivendas publicas da rúa da Ameixaga. Están todas ocupadas? Precisan algún tipo de intervención?
• Crear vivendas en alugueiro municipal como eran as da Praza 8 M debe ser unha prioridade. Os edificios en ruina ou que precisan rehabilitación deben dispoñibilizarse con plans de acción. Nisto o Consorcio non ten que dicir?
• Analizar o procedemento das licencias en urbanismo para axilizar e priorizar: instalación de ascensores e rehabilitación de pisos pechados. Acompañar ás comunidades que queren emprender melloras de habitabilidade e accesibilidade.
• Sobretaxas (auga, lixo) para as vivendas baleiras.

Poden poñerse en marcha accións dirixidas á mellora, restauración e reforma das vivendas residenciais.

• Acción decidida para rescatar vivendas en pisos altos: promover a instalación de ascensores: informar, acompañar, axudar ás comunidades e as persoas, desde o concello, como se fai no caso das ARI, en zonas con edificios dos anos 60 e 70.
• Promover a rehabilitación de vivendas en ruína mediante convenio cos propietarios. Esta debe ser unha das liñas de traballo prioritario do Consorcio
• Declaración de zonas de rehabilitación para os barrios e zonas que precisan actualizar o parque de vivendas (zona Quiroga Palacios, Pontepedriña, Almáciga)
• Fusionar o proceso administrativo: licencia urbanística, permiso contedores, permiso andamios, ocupacións de rúas… Dar apoio administrativo e económico ás intervencións de rehabilitación en barrios envellecidos como o noso.

Accións relativas ás VUT

• Establecer un mecanismo doado e confidencial para a comunicación de pisos turísticos ilegais ou situacións sospeitosas na vivenda, infravivendas, abusos… dirixido especialmente ás entidades sociais e veciñais; ten que haber un mecanismo áxil e dinámico., con seguimento e transparencia nas comunicacións.
• Inspección das denuncias efectuadas
• Emprender accións para que os pisos turísticos ilegais (pero tamén os legais fora de tempada) sirvan como vivenda a alugueiros breves de xente traballadora, persoal investigador, residentes ocasionais,… (Unha axencia municipal?). Compostela ten tamén necesidade deste tipo de vivendas temporais e se liberaría parque para outras necesidades mais permanentes.
• Tamén deberían establecerse taxas específicas para elas e ter unha imposición acorde ao tipo de negocio que son e o produto que ofrecen. Son empresas e deben pagar polos servizos municipais de xeito diferenciado aos particulares.
• Engadir nas convocatorias unha prohibición expresa a usos turísticos das subvencións públicas para rehabilitación de vivendas.

Si, algúns puntos se repiten. Agardamos que a repetición sirva para entenderse mellor e animar á acción.

Ben sabedes, porque o vivides cada día, da crecente presenza da actividade turistica no noso barrio.

Coñecedes ben o lado bo, ese da xente riquiña que ven a vernos e gozar das nosas rúas e compañía, e experimentades tamén o lado malo. Ese da ocupacion das nosas rúas, a banalización do noso patrimonio, a invasión do espazo publico, os ruídos…
Tamén vivides o lado cruel, o da suba dos alugueiros e da expulsión de persoas e negocios da nosa comunidade.
Atentas a esta situación e procurando enriquecer as nosas perspectivas e propostas organizamos coa AV Fonseca un pequeno acto o proximo mércores no Museo do Pobo Galego.
Será para coñecer de primeira man os resultados da investigacion sobre o impacto do turismo nas nosas comunidades locais desenvolvido pola Rede Galabra, que xa hai anos puxo sobre a mesa datos reais sobre a nosa complexa relación coa actividade turística, a deriva do Camiño e outros temas de interese.

Pensamos que para entender a realidade e xerar novas perspectivas é preciso informarse e ter en conta os datos e análises, máis alá de contos e sucedidos. Nisto, como en todo, a información é poder ou polo menos máis capacidade de acción.

Por iso queremos convidarvos a coñecer de primeira man os resultados desta investigación, porque no correcto equilibrio da actividade turística coa vida comunitaria está o futuro do noso barrio.

Agardamosvos!
Lembrade:

O Impacto do Camiño nos nosos barrios.  Presentación a cargo do Prof. Elias Torres
Mercores 19 de febreiro as 19h
Auditorio do Museo do Pobo Galego

Agradeceremos tamén que axudedes a difundir o acto entre a veciñanza e nas redes sociais.

ACTUALIZACION DO 5 DE NOVEMBRO:

Despois de tanto ir e vir e tantos meses sen servizo, na reunión mantida o pasado luns 2 cos concelleiros X. Domínguez (Servizos) e X. Duro (Mobilidade), temos noticia dun plan para devolver á rúa Costa do Vedor o servizo de recollida de lixo. Se instalará na confluencia da rúa con Quiroga Palacios un semáforo para asegurar que o vehículo que fai a recollida poda baixar sen dificultade nin atopar vehículos de fronte; o semáforo pechará a rúa no horario de recollida a calquera outro vehículo e estará debidamente informado e sinalizado.

Dado que hai que enganchar o semáforo á rede, hai que facer unha pequena obra que tardará uns días. O concello pide á veciñanza un pouco mais de paciencia.

Pola nosa parte, só podemos congratularnos do cambio de parecer pero lembramos que é obriga do concello prestar certos servizos e ter en conta que na cidade histórica todo debe adaptarse ás súas características e non ao revés pois é un ben prezado que temos que acariñar coidando rúas e edificios pero tamén apoiando á veciñanza que da vida a eses espazos urbanos. Doutro xeito afondamos os procesos de envellecemento e abandono.

E diso xa temos bastante.

******

Á vista da supresión do servizo de recollida de lixo na Costa do Vedor, das queixas expresadas desde o principio por terra, mar e aire e das promesas incumpridas, a xunta directiva acordou solicitar unha nova reunión sobre o tema no Concello nada mais volver do receso do verán.

Este encontro tivo lugar o día 1 de outubro. Agardamos un tempiño para ver os resultados e, na vista deles, compartimos convosco o contido da reunión.

Estiveron presentes os concelleiros de Servizos e Obras (X. Domínguez) e Mobilidade (X. Duro) e aínda que falamos principalmente do problema da Costa do Vedor, aproveitamos para comentar algunha necesidade mais do barrio.

A Costa do Vedor

Os concelleiros volveron a explicar a razón pola que se retirou a recollida: é rúa moi encostada o que supón un perigo e dificultade dos camións de recollida, así que os camións tiñan que facer manobra complicada (recoller o de abaixo volvendo á Quiroga Palacios marcha atrás e o de arriba entrando en sentido contrario).

Visto que isto se fixo así toda a vida, nin nós nin a veciñanza entendemos a suspensión dun servizo tan importante nunha rúa completa e con evidentes problemas de accesibilidade sen ofrecer alternativa algunha.

Nesta reunión explicóusenos a “razón” de fondo:

• Os camións de carga traseira teñen problemas nesa rúa e traballaban con esa peculiar manobra mercé a un sinal que especificamente os autorizaba.
• Para evitar problemas o camión pasaba as 4 AM.
• Tras varios “conflitos” coa veciñanza (¿?¿?), a Policía Local fai unha avaliación de riscos e decide retirar o sinal que indicaba a excepción para o servizo de lixo. E así quedan prohibidas as manobras que se fan desde sempre e que permiten a recollida do lixo.
• Para “suplir” instálanse colectores na rúa das Fraguas (debaixo da xanela dunha vivenda) e en Quiroga Palacios se trasladan os colectores que había no final (coas conseguintes queixas da veciñanza daquela rúa).

Tal e como nós o vemos, e se lle explicou hai xa meses:

• Se o servizo se prestaba, ten que seguir prestándose; para iso hai unha taxa de recollida de lixo que a veciñanza desa rúa paga relixiosamente.
• A Costa do Vedor é unha rúa de complexa accesibilidade e cunha veciñanza envellecida é inhumano facer que a xente suba (ou baixe para logo volver a subir) esa costa para deixar o lixo no horario permitido (despois das 21PM, lembremos). É precisa unha solución.
• Esa rúa ten unha pendente de 13% que seica desafía a seguridade dos vehículos. É certo que é de orografía difícil pero leva alí de sempre e está comprendida no Plan Especial; se a licitación da contrata non preveu que temos rúas antigas, estreitas e en costa, non é culpa nosa nin da veciñanza así que o servizo ten que prestarse igual.
• Se a cidade enteira fai un enorme esforzo na recollida do lixo procedente dalgúns sectores e zonas (establecementos turísticos do centro histórico) subvencionando de xeito encuberto a certos negocios, tamén podemos facer un esforzo e dar un servizo mínimo á propia veciñanza deses barrios históricos cuxo despoboamento queremos evitar.
• Non entendemos ven iso do “conflito” coa veciñanza. Son coches que suben a esas horas (4AM) pola rúa? Son tantos que se produciron enfrontamentos? Son residentes?

Xa alí aproveitamos para comentar o servizo en xeral:

• O deficiente funcionamento da recollida de lixeiros e dos contedores.
• A situación insostible e lamentable da praza 8 de marzo, chea de contedores (polo xeral sucios) Non podería poñerse algunha estrutura de madeira que enfeite a Praza?.
• Se están precintados, que se precinten de xeito que non podan usarse de verdade. E que se arranxen na medida do posible.
• Outro tanto sucede na zona central de Concheiros, que nunca chegaron a funcionar correctamente (porque segundo nós posiblemente está mal instalada ou o encofrado ou a maquinaria) segundo a concellería de obras porque nunca estivo previsto que funcionaran.

E preguntamos pola rúa Concheiros porque estamos fartas de parches nunha obra que non ten nin 4 anos rematada, é sucia e molesta para a veciñanza que alí vive:

• A obra continua sen ser entregada así que non se pode facer nada!!! (nin sabe nin contesta)
• Non é “responsabilidade” desta concellaría de Obras os problemas recorrentes, por canto é cousa do goberno anterior (¿!¿!?!?!) (“non é nosa obra”)

Dicir que foi unha decepción é quedarnos curtas, a verdade.

Quince días despois solicitamos información sobre as xestións que quedaron pendentes. Seguimos agardando.