PROGRAMA DE ACTIVIDADES 2016-17

01. Outubro 2016 · Comentarios desactivados en PROGRAMA DE ACTIVIDADES 2016-17 · Categories: A Xuntanza, Actividades, Uncategorized

AÍNDA QUEDAN PRAZAS!!

Un ano máis presentamosvos a nosa oferta de actividades para o curso que comeza. Temos propostas tradicionais como baile, corte e confección ou pandeireta pero tamén novas ideas como Scrapbooking (personalizar cadernos e albumes), zumba, pintura creativa e danza fusión oriental ou mesmo un obradoiro trimestral para construir a vosa xenealoxía e historia familiar. Non diredes que non hai de sobra e variado!

Os cursos comezarán o 3 de outubro.

Como sempre, cada actividade ten o seu precio, ao que haberá que engadir os 2 € de achega para axudar nos gastos do local (si, seguimos traballando para que volva á Rede de CSC e o Concello se faga cargo).

Hai que matricularse durante a semana que ven e para isto estaremos no noso local de 19 a 21h. Esta matrícula é gratuita para os socios e socias que estean ao día no pago das cotas, para o resto custa 10 €.

Aquí tendes:
1.- BAILE GALEGO Martes de 20:00 a 21:00 horas* (Iniciación) / de 21:00 a 22:00 horas* / de 22:00 a 23:00 horas*
Monitora: Felisa Segade    *Prezo a repartir entre cada grupo.

2.- CANTO Luns de 10:00 – 13:00 horas. Clases individuais.
Monitora: Paulina Ceremuzynska.

3.- CERÁMICA Mércores de 19:00 a 20:30 horas – 27 €/mes.
Monitora: Juana

4.- GUITARRA Luns de 15:30 a 19:30 horas. *Prezo a repartir entre cada grupo
Monitor: Xavier Mugardos

5.- CORTE E CONFECCIÓN / Arranxos de roupa Martes de 18:00 a 20:00 horas.  Xoves de 18:00 a 20:00 horas – 30 €/mes.
Monitora: Susa Garcia

6.- GAITA Xoves de 20:30 a 22:30 horas – 18 €/mes.
Monitor: Marcos Varela

7.- PINTURA CREATIVA Venres de 18:00 a 19:30 horas – 35 €/mes (inclúe materiais)
Monitora: Isabel

8.- IOGA Luns de 19:00 a 20:30 horas – 17 €/mes.
Monitora: Maite

9.- PILATES Luns e Mércores de 9:00 a 10:00 horas, e de 18:00 a 19:00 horas – 22 €/mes.  Sábados de 10:00 a 11.00 horas – 10 €/mes.
Monitora: Maite

10.- LINGUA DE SIGNOS: (Básico-I) Xoves de 20:00 a 21:30 horas.
Monitora: Galensigna

11.- PANDEIRETA E CANTO Venres de 18:00 a 19h (Nível I), de 19:00 a 20:00 horas (Nivel II), de 20:00 a 21:00 horas (Nível III) – 28 €/ mes.
Monitora: Jara

12.- TEATRO Luns de 21:00 a 23:00 horas – 18 €/mes.
Monitora: Beatriz Bravo

13.- COIRO (Iniciación)   Luns de 20:00 a 21:30h – 30 €/mes.
Monitor: Fer

14.- TAMBORIL – Percusion tradicional Martes de 20:30 a 22:00 horas – 25 €/mes.
Monitora: Arantxa  Esta actividade, impartirase no Centro Sociocultural da Trisca.
.
15.- NOVA XOIERÍA  Mércores  de 18:00 a 19:00 horas – 28 €/mes.
Monitora: Juana

16.- ZUMBA Mércores de 21:00 h. – 22:00 h. – 20 €/mes.
Monitora: Pilar

17.- SCRAPBOOKING Mércores de 20:00 h. – 21:30 h. – 25 €/mes.
Monitora: Lucía (Dulces y Saladas)

18.- DANZA FUSION ORIENTAL Martes de 18:30 a 19:30 horas – 15 €/mes.
Monitora: Maika

19.- MEDITACION TRANSCENDENTAL Xoves de 19:00 a 20.30 horas
Monitora: Zinnia Maravell

20.- XENEALOXÍA E HISTORIA FAMILIAR Mércores de 19:00 a 20:00 horas – 20 €/mes (1º Trimestre)
Monitora: Pilar

 

II Día do Barrio en Forma

26. Setembro 2016 · Comentarios desactivados en II Día do Barrio en Forma · Categories: A Xuntanza, Actividades, O Barrio

Despois do éxito do ano pasado, temos aquí unha nova edición do Barrio en Forma, xornada do deporte na rúa. A comisión organizadora decidiu tamén que terá, para sempre, unha data fixa: o primeiro sábado de outubro; así retomamos a rutina con maior alegría.

Nesta ocasión temos moitas novidades asi que prestade atención.

A filosofía

Promover hábitos de lecer activo, coñecer mellor a oferta a este respecto do barrio, pasalo ben e dar vida á Rúa do Home Santo, que é un sitio ben chulo. En conxunto, ser un barrio máis en forma.

En forma?

Hai quen di que hai que facer exercicio e estar en forma. Pero, que é estar en forma?
Ao cabo, redonda é unha forma, e cadrada; e é que mesmo cousas como os macarróns teñen unha certa forma (si, acaracolada). Si, estamos en forma redonda, triangular e mesmo en forma atlética. Como barrio podemos ter mellor forma, persoal e colectiva.
Será o sábado 1 de outubro de 10 a 19h.

Haberá parada para xantar, alí ou na casa; tamén para repoñer folgos.

Onde?

Na rúa, que é onde facemos todas as cousas importantes neste barrio. Neste caso, na Rúa do Home Santo, que será peonil e estará despexada de coches.

Que faremos?

Investigaremos en común que é iso de “estar en forma” cun amplo programa de actividades aberto á toda a veciñanza. Poderemos practicar as nosas disciplinas favoritas ou probar cousas novas; desde logo, botaremos unhas risas e moveremos o esquelete, cada quen segundo as súas ganas e capacidade. Hai un completo programa, con moito para elixir

Concretamente?

Haberá ioga, baloncesto, brilé, volei, xogos tradicionais e de rúa, pilates, rugby, urban dance, bodycombat, taekwondo… mesmo esgrima ou danza oriental. Todo en pequenas dosis de 45 min. En breve difundiremos o programa completo.

Hai que anotarse?

Non, abonda con presentarse.Trae compañía, o exercicio en grupo é máis divertido.

Que teño que levar?

Bo humor e intención de descubrir novas propostas. Equipación deportiva (ou máis ou menos).

Algunha sorpresa?

  • Un programa máis amplo con actividades de todo tipo e acaídas a todos os públicos.
  • Novas camisolas.
  • Unha actividade sobre rodas, asi que ide preparando os vosos equipos.

Vémonos o sábado 1  a partir das 10h na rúa do Home Santo e durante todo o día ata as 19h.

Orzamentos Participativos 2016

24. Xullo 2016 · Comentarios desactivados en Orzamentos Participativos 2016 · Categories: A Xuntanza, O Barrio

A estas alturas xa ben sabedes que somos partidarias de promover a transparencia e fórmulas de participación dos nosos socios e socias e tamén do resto da veciñanza neste complexo esforzo de facer barrio e construír un futuro mellor para a nosa pequenas comunidade. Como podemos e cos nosos precarios medios, traballamos por facer realidade este obxectivo.

Entendemos que así debería facerse a todos os niveis, nas administracións e entidades que nos gobernan e que administran os bens e servizos comúns. Por este motivo, saudamos positivamente a iniciativa do goberno municipal para poñer en marcha procesos de Orzamentos Participativos, é dicir, procesos nos que a veciñanza poderá opinar e decidir sobre o destino dos cartos que son de todos e todas.

Nós -como moitas outras asociacións de todo tipo da cidade- pertencemos ao grupo Motor, aquel que acompaña o proceso, discute as normas do xogo, etc. Asistimos xa a varias reunións e non podemos negar que houbo dialogo e debate, moitas preguntas e algunha preocupación; ao cabo, as asociacións somos como as persoas e damoslle moitas voltas as cousas cando se trata de iniciar novos camiños e temos inseguridades e nos pesa a responsabilidade.

O proceso desenvolverase en diversas fases e ao longo de varios anos nas distintas zonas da cidade, asi que temonos que preparar para cando nos chegue o momento de entrar a fondo e decidir. Entretanto a nosa implicación nos orzamentos ten dúas liñas claras: o acompañamento ao proceso a través do grupo motor e a participación nas propostas e decisións para o conxunto da cidade.

Queremos convidarvos a seguirnos, como veciñas e veciños comprometidos co barrio e a cidade, neste camiño. Queremos animarvos a presentar propostas, a acudir ás asambleas de diagnose e debate, a reflexionar sobre esta fermosa cidade que construímos cada día e a decidir sobre as cousas que poden mellorala. Coma sempre, a vosa opinión é importante e o acto de responsabilidade que implica participar e decidir fainos mellores veciños e veciñas.

Aquí tendes algúns datos importantes:

  • Na web Compostela Decide tendes a info principal sobre o proceso
  • A primeira asamblea cidadá será o xoves 28 de xullo no CSC do Ensanche ás 19.30h
  • A AV a Xuntanza está barallando propostas para presentar, aplicables ao conxunto da cidade. Serán decididas na reunión da directiva que teremos á volta das vacacións (previsiblemente o 6 de setembro). Intentaremos facelas chegar aos socios e socias antes, para enriquecelas coas súas achegas.
  • Podedes presentar as vosas propostas directamente a través da web de Compostela Decide ou nas Asambleas pero como nós (como Asociación) poderemos presentar ata 5 proxectos, se queredes facernos chegar as vosas ideas ou dúbidas, mandadenos un email a info@axuntanza.org
  • Dous exemplos de procesos en marcha noutras cidades, para ter mellor idea do asunto

Asi que aproveitade os longos e fermosos días de verán e o tempo libre que tendes para ver a cidade con outros ollos e imaxinar propostas BBB (boas, bonitas e baratas) que a melloren!

 

 

 

No camiño da pacificación e da seguridade, para o noso barrio

17. Xuño 2016 · Comentarios desactivados en No camiño da pacificación e da seguridade, para o noso barrio · Categories: O Barrio, Uncategorized

Hoxe a Xunta de Goberno Local aprobou un plan que porá en marcha unha serie de cambios substanciais na mobilidade dentro do barrio. Entre as medidas que se tomarán a partir do 1 de xullo, a máis visible é a peonalización da rúa de San Pedro pero hai outras que a nós parécennos tanto ou máis importantes porque buscan dotar ás rúas adxacentes de maior seguridade e de menor tráfico rodado.

Ben sabedes como a seguridade, a comodidade da veciñanza e a redución do tráfico parásito e axitador no barrio é unha teima nosa desde hai décadas. E non podía ser doutro xeito, xa que vemos todos os días o perigo dos coches na rúa Lagartos, os riscos derivados dos que van embalados pola Calzada de San Pedro e Belvís, as vibracións e ruido que sufren as persoas que viven (e durmen) nas vivendas a nivel de rúa…

Si. Aquí ben sabemos que o problema vai máis alá da Rúa de San Pedro e que é preciso intervir no conxunto do barrio ou, cando menos na contorna inmediata a esa rúa. Por este motivo, acollemos positivamente o novo plan que, aínda que non recolle todas as nosas ambicións (o conxunto do barrio), é un grande paso na dirección axeitada. E tamén nos gusta porque foi negociado e renegociado ata que houbo o acordo que hoxe nos permite avanzar e que permitirá que sexa permanente no tempo; será avaliado e retocado no que non funcione, pero non haberá volta atrás.

Na web do Concello tendes o documento que recolle todo o plan e, resumidos, os cambios principais e planos.

Os máis relevantes son:

  • O plan comeza a funcionar o 1 de xullo e é o principio dunha transición que se quere suave e que busca a pacificación e seguridade das nosas rúas.
  • peonalización da rúa Lagartos e contorna, que quedará só para vehículos autorizados e residentes, de xeito que se elimina o tráfico parásito e perigoso desa rúa e das rúas adxacentes (Chufas, Campo do Forno, etc).
  • Peonalización da rúa de San Pedro, que quedará aberta só aos residentes e vehículos autorizados, carga e descarga no horario correspondente e unha liña de autobús que circulará cada 15/20 minutos. O resto dos buses funcionarán como no tempo das obras tendo parada -agardamos que sinalizada, por fin- en Rodríguez de Viguri preto de Concheiros.
  • Sabendo que unhas persoas viven nunha zona do barrio e teñen o garaxe noutra, que hai negocios con almacéns ben lonxe, etc. insistimos en que o acceso á rúa de San Pedro fose para o conxunto dos residentes da zona 3. Non obstante, é unha concesión provisional e que se avaliará no futuro en función do tráfico que xenere nesas rúas. Queda nas nosas máns usar este dereito de forma xuiciosa así que usadeo con moderación. Se a rúa está ateigada cos nosos coches, non valerá para nada todo isto.
  • Cambio de sentido da Corredoira das Fraguas, que agora sairá a Quiroga Palacios para evitar que, como pasou durante a obra, os coches usen esa zona como vía para ir de Virxe da Cerca a Avda. de Lugo, xerando tráfico innecesario e a velocidades inadecuadas na rúa das Trompas, no Parque e no corredor ata Concheiros. De paso evitaremos a inseguridade no acceso ao colexio Vilas Alborada e a destrución do pavimento da rúa das Fraguas.
  • Estes cambios farán desaparecer algunhas prazas de aparcamento. Por isto e para evitar coches de fóra dando voltas para aparcar, todas as prazas do perímetro Rua do Medio-Calzada de San Pedro-Fraguas serán de residentes24 h zona 3 (o paso, de ser necesario, será pola travesa de San Pedro). Tamén as que hoxe hai na Cruz e rúa de San Pedro que serán de residentes, de noite.
  • Para un mellor aproveitamento do escaso aparcamento e mellor servizo ao comercio haberá cambios nos horarios de carga e descarga da Rúa do Medio e Cruz de San Pedro, pois comezará ás 9 da mañá. Así as prazas poderán usarse tamén de noite.
  • A principios do ano que ven haberá unha reformulación das liñas de autobuses da cidade; incluirá a posta en marcha dunha liña, chamada polo de agora Liña Cero, que será servida por un bus pequeno e eléctrico e reforzará o servizo da zona de Belvís-Quiroga Palacios e pasará tamén pola rúa Betanzos.
  • O control do tráfico da rúa de San Pedro faráse cunha cámara. Poderán acceder á rúa todas as persoas que teñan tarxeta de residente da zona 3; os negocios e residentes que non dispoñan dela poderán tamén pero terán que tramitar unha autorización.
  • Haberá unha reunión informativa o próximo luns as 20h na Casa da Xuventude na que o Concelleiro e o seu equipo explicarán o plan e respostarán calquera dúbida.

Todo isto, como xa se dixo, comezará a funcionar o 1 de xullo. A partir dese día, estará a sinalización, cámara de control, etc. Entraremos na fase 1 dun proceso que estará en construción e que se avaliará constantemente para ir axustando.

Finalmente, non queremos rematar sen facer público o noso agradecemento a todas as persoas que desde as directivas anteriores da nosa asociación fixeron un longo e bravo esforzo para explicar as nosas reivindicacións tanto aos responsables políticos e técnicos como ao resto da cidadanía, por facerlles entender que tráfico non é mobilidade e que o importante son as persoas ou que sen rúas habitables non hai barrio. E tamén aos moitos veciños e veciñas que nos medios de comunicación, nos xantares familiares, tertulias etc., apoiaron o noso traballo nesta liña. Sen ese traballo pedagóxico todo isto non tería sido posible.

É o menos que podemos facer neste día no que comezamos unha nova andaína e sentamos as bases dun futuro diferente, ese no que o barrio é máis seguro e cómodo para todos e todas.

 

Sábado 11 de xuño, Día do Barrio

05. Xuño 2016 · Comentarios desactivados en Sábado 11 de xuño, Día do Barrio · Categories: A Xuntanza, Actividades, O Barrio

O Día do Barrio é unha xornada especial.

Ese día

  • aprenderemos a compartir e coidar os nosos espazos públicos
  • colaboraremos para mellorar o aspecto das nosas rúas e recunchos
  • e, como  non podía ser menos, pasaremos un bo rato cos nosos veciños e veciñas.

Por que?, porque:

  • O barrio é a nosa casa e nós temos que ser os primeiros en coidalo, no día do barrio e nos outros días do ano; non queremos suplantar aos servizos municipais.
  • Porque somos moi creativ@s e podemos facer cousas moi chulas

A cita será o sábado día 11 de xuño a partir das 11h na Cruz de San Pedro, ata as 14h

Que necesitades?

  • Ganas de traballar
  • Anotarte mandandonos unha mensaxe a info(arroba)axuntanza.org, non porque sexa obrigatorio senón porque asi podemos organizar mellor as tarefas.

Que faremos?

Un pouco de todo, como os anos anteriores, en función da cantidade de xente que participe. Pero desde xa, algunhas ideas que precisan da vosa colaboración e tendes que comezar a traballar nelas:

  • Facer deseños nas beirarrúas e prazas con xogos
  • Recollida de alimentos para o Banco de Alimentos
  • Instalación dunha mostra de Urban knitting
  • e moitas cousas mais

O 21 de maio, Mercado do Caracol

05. Maio 2016 · Comentarios desactivados en O 21 de maio, Mercado do Caracol · Categories: A Xuntanza, Actividades, O Barrio

Trae a túa casa ás costas ao Mercado do Caracol

Pensamos que estes tempos complicados son perfectos para simplificar as nosas vidas, para interiorizar a práctica dos 3R (reducir, reutilizar e reciclar) e para ser máis solidari@s.

Lembras esa cafeteira en perfecto estado que esmorece nun armario da túa casa? Esa lámpada que realmente nunca conseguiches encaixar na túa sala? E aqueles patíns tan lindos? A bici estatica-percheiro?… Fai inventario, simplifica a túa vida e trae contigo todas esas cousas pois aqui poderás vendelas, trocalas ou mesmo regalalas.

Soñas con renovar a túa mesiña de noite cunha lámpada resultona e eficiente? Gustaríache equipar mellor a túa cociña? Tes grandes proxectos para este curso e precisas accesorios deportivos?… Este é a túa oportunidade.

Que algunha das túas trapalladas é grande? Trae a unha foto e poderás atopar quen o necesite.

Buscas… pero non sabes moi ben que? Leva a túa lista, porque nas nosas casas hai moitas cousas durmindo polas esquinas que mellor estarían noutro fogar.

 … e aínda poderás redescubrir unha zona do barrio e os seus establecementos comerciais. É o día perfecto para facer compras nos negocios desta rúa ou para tomar un bó almorzo

 A cita é o sábado 21 de maio na Rúa do Home Santo, das 11 ás 14h.

 Se queres vir e traer a túa casiña, lee con atención estas instrucións

Quen poda dicir que é de San Pedro de sempre, que levante a man

26. Abril 2016 · Comentarios desactivados en Quen poda dicir que é de San Pedro de sempre, que levante a man · Categories: A Xuntanza, Actividades, O Barrio

Hai alguén?
Pois vai resultar que estás un pouco errad@.
Vivimos nun sitio que naceu como cidade no momento exacto en que armaron o asunto do Apóstolo así que, non, ti non es do barrio de toda a vida porque, simplemente, aquí non sempre houbo vida e ademais, non había ninguén. O mesmísimo Cristovo Francés -o eremita que fundou a capela da Angustia aló polo século XV- era, como o seu nome indica, de orixe gala.

Se observamos os planos antigos -coma este que achegamos de 1796- é aínda máis evidente: o barrio e as nosas rúas foron conformándose co paso do tempo, a medida que as xentes foron chegando doutras zonas da cidade, doutros pobos, doutras terras. É así como medrou o barrio en tempos remotos e medievais pero tamén hai 40 anos, cando as nosas persoas maiores chegaron do Pino, Arzúa ou Melide e tomamos aire de cidade, ou hoxe, cando a xente máis nova chega de todos os recantos do mundo.

Non foi en van que nos chamaron, noutro tempo, Os Estados Unidos. Somos o resultado dunha fusión, da mestura de xentes de diferente orixe: mulleres e homes, rural e urbano, da contorna ou de terras afastadas. O que uniu ás persoas que viviron aquí antes que nós – e o que nos une hoxe – é outra cousa, non é un pasado común senón o desexo de construír un futuro. Será porque vivimos na fronteira ou porque somos como o socalco -conformado por capas que se van pousando-, que somos un tanto cosmopolitas, tendentes á autoxestión, algo descreid@s, ás veces brav@s, cun forte sentimento identitario e dad@s a mirar cara adiante e non cara atrás. Igual nesta mestura está a explicación de todo.
O que nos dá forma, mentres vivimos neste barrio, é o desexo de pertencer a esta comunidade, nada máis.
Isto ven ao fío do que será o eixe central da Feira da Primavera deste ano: a sensibilización sobre unha acollida cálida e xenerosa a quen busca unha vida mellor fuxindo da guerra, da fame e da opresión ou de quen simplemente necesita cambiar de aires para reconstruír o seu proxecto de vida.

Somos un barrio aberto e, como tal, honrando a memoria de quen viviron aquí antes ca nós, acolleremos a quen queira vir e construír o seu futuro entre nós. Así, tamén, faremos barrio.

 

O Concepto Ecovaso

21. Abril 2016 · Comentarios desactivados en O Concepto Ecovaso · Categories: Actividades, O Barrio

O enorme esforzo organizativo que supón a Feira da Primavera ou as Festas ten unha finalidade específica: fortalecer a nosa pequena comunidade no social, no económico e no cultural para poder afrontar con certas garantías os retos do presente e o futuro.

Queremos un barrio no que se poda envellecer con comodidade, capaz de atraer xente nova que veña a vivir e a traballar, cun comercio próximo e forte, cun patrimonio recoñecido e respectado e unha vida social e cultural viva e alegre.
Non cabe dúbida que os nosos grandes eventos son un puntal fundamental na busca destes propósitos pero tamén é certo que poden converterse nunha importante ameaza.

Por isto hai que pensar nunha Feira e Festas que sexan sustentables a todos os niveis.

Por iso tanto nós, como a Comisión como cada un dos veciños e veciñas temos que pensar tamén no impacto ambiental, entendendo “ambiental” na súa concepción máis ampla.
É nesa clave que se pensa a programación (para todos e todas, con horarios e lugares axeitados) ou se organiza a colocación dos postos (a seguridade primeiro).

Todos e todas contribuímos a sostibilidade das festas cando usamos as papeleiras e baldes para lixo, cando usamos os WCs portátiles que se instalan (e que costan unha pasta), cando moderamos os gritos e cantos nas horas nocturnas (os sons inapropiados chámanse ruidos), cando traemos unha bolsa para gardar as compras que faremos, cando compramos neses días e calquera outro día cousas que non veñen do outro lado do mundo, cando somos amables coa xente que atende postos, negocios e as cantinas… porque sostibilidade significa facer posible que a feira ou a festa poda volver a celebrarse; porque o “ambiente” non é só cousa de prados, montes, ríos e outras cousas ecolóxicas senón tamén as rúas e o “ambiente” social que compartimos.
Máis que nunca, nesas datas hai que exercer aquelo que antes se chamaba “urbanidade”; se a feira ou a festa molesta porque hai mexadas nos portais, cristais rotos nas rúas, plásticos por todas partes, medo a vir con cativs ou persoas maiores ou rollos chungos… o equilibrio sustentable crébase e os obxectivos que buscamos tamén.

E logo tamén está a sostibilidade “clásica”, que aínda que pareza dificil de implementar nestas datas non o é tanto:

  • Adeus plásticos de usar e tirar:  ecovaso=vaso que poda ser reutilizado. Podes compralo aquí, traer o doutros anos ou mesmo baixar da casa unha peza da túa lustrosa vaixela. Trátase de reducir o consumo de plástico e a presenza de cristais rotos na rúa; a nosa experiencia demostra non só que é necesario senón tamén que é posible. O lixo deste tipo descendeu arredor dun 80% desde que comezamos a usalos, asi que trae ou compra o teu vaso e pide a túa consumición nel na cantina e nos bares. Doado!
  • Usas os WCs portátiles, para que os sumidoiros non se enchan con líquidos e produtos varios que contaminan se non son axeitadamente tratados.
  • Usas as papeleiras, contedores…
  • Ves no teu coche e logo non atopas onde aparcar e xa chegas ao barrio con certo mal rollo? hai buses, opcións de coche compartido ou taxi. Se ves de lonxe, aproveita o bono de RENFE (que ademais poderás usar toda a semana).

Que fan os organizadores neste sentido? Nós tamén, como coorganizadores da Feira:

  • vimos a pé (que é, ademais, sanísimo)
  • programamos actividades e horarios para todos os públicos: para que todo o mundo estea contento e non haxa balbordo a altas horas da noite
  • organizamos a feira de xeito que haxa unha circulación fluída de persoas e non se formen, na medida do posible, aglomeracións.
  • instalar colectores de lixo
  • instalar Wcs públicos (na entrada da rúa do Medio pola Pza 8 de marzo e ao fondo da pza do Cruceiro)
  • usar nas cantinas embalaxes reciclables; separación de lixo
  • preferir o producido ou vendido no barrio en toda a cadea de subministración
  • promover o uso do ecovaso (único admitido nas cantinas da comisión e en moitos negocios, búscaos)
  • reducir en toda a organización e difusión o consumo de papel

E tí que vas facer? Sabes iso de pensa en global e actúa en local

Feira da primavera: The making of

19. Abril 2016 · Comentarios desactivados en Feira da primavera: The making of · Categories: O Barrio

Este mércores, o voluntariado das festas terá unha reunión crucial pois alí, ademais de facer un repaso do ritmo das tarefas en marcha para as Festas, haberá a organización das labores relacionadas coa Feira da Primavera (apoio á montaxe dos postos, ao operativo de tráfico, quendas das cantinas…). En paralelo, o luns terá a Comisión a súa propia xuntanza (estaremos tamén nós). E así, a organización da Feira da Primavera entra na súa fase final. Antes, durante e despois manterase o esforzo encamiñado ás Festas do Barrio, que serán a partir do 29 de xuño.
O impacto de ambos eventos na nosa vida social é enorme e o económico foi estimado nun medio millón de euros (si, unha morea de cartos); e aínda habería que falar do que supón para a imaxe do noso barrio á hora de presentalo como un lugar atractivo para vivir e traballar. Os froitos en termos de nova veciñanza e consolidación do tecido económico son evidentes.
E todo isto é grazas ao traballo desinteresado de moitas persoas. Sí, noutros sitios os concellos pagan moito diñeiro a empresas e expertos para que deseñen e executen plans de dinamización social e económica. Aquí arranxamonos co voluntariado, coa xenerosidade de veciñanza, entidades e establecementos comerciais, imaxinación e moita, moita boa vontade e tempo. E non hai cartos que paguen isto, nin palabras que podan expresar o noso agradecemento.
É un traballo de formiguiñas no que se rouba tempo ao lecer, ás familias, ao descanso e ao traballo. Somos un barrio con unha misión!
Deseñar unha programación e imaxe, achegar ou recoller as novas protestas, xestionar todo o papeleo co concello, visitar os establecementos comerciais -un a un, en horario comercial-, percorrer todas e cada unha das casas para informar e para pedir as colaboracións, a loxística, recibir os parabens e tamén as queixas e malas caras (que tamén as hai, todo hai que dicilo)…
A Feira é un proxecto en si mesmo: o anuncio, as inscricións, a selección dos postos (que serán 200 dos 400 que se presentan), revisar as rúas unha por unha, comprobar a fórmula máxica que permite instalar todos e cada un dos postos (anaco de rúa sen negocio, portal ou garaxe) e revisar os postos solicitados (tamaño, características), e logo armar o Tetris e dar a cada un un lugar; pensar na seguridade dos peóns, en evitar tapóns que supoñan risco de aglomeración, discurrir formas para que non haxa botellón neses treitos de desafogo, como a Praza do Cruceiro, argallar as quendas para poñer papeis para que os coches non aparquen, …
Xa sabemos que pensabades que todo era dar unhas palmas e se armaba a cousa, pero non é asi 😉

A Feira da Primavera e as Festas, son froito dun enorme e impagable traballo no que se implican moitas persoas, cada quen no que pode. Hai moitísimas cousas que facer e todas son necesarias; desde o inmenso esforzo da comisión -que se reune infinitamente de xaneiro a xuño en plenarios e subcomisións específicas- ata a colaboración dese veciño que na Feira da Primavera e o sábado das festas a primeirísima hora sube a unha escaleira cunha bolsa de lixo para tapar un sinal de tráfico na súa rua.
Todo é necesario.
Pero o certo é que sen a xenerosidade de todas, estes proxectos non serían posibles e menos aínda a custe case cero. Sabemos que cada acto voluntario é unha renuncia a unha tarde preguiceira, a un rato con amizades ou familia, a un paseo polos nosos fermosos parques ou mesmo a unhas horas de  sono porque hai que recuperar o tempo de traballo investido en horario laboral para ir polas tendas ou polas casas a recadar doazóns.
Por isto queremos amosar públicamente o noso agradecemento a toda esta xentiña. Sen eles e elas, sen o seu esforzo desinteresado todo isto non existiría e seríamos un deses barrios aburridos e tristes. Grazas a todos e todas!

Queres saber o que podes facer? aínda estás a tempo para apoiar e participar, indo á reunión de voluntariado mañá día 20 ou ben axudar a armar a supermegadecoración de maios que se está preparando.

 

Tanto esforzo… para nada?

12. Abril 2016 · Comentarios desactivados en Tanto esforzo… para nada? · Categories: A Xuntanza, O Barrio

plano ceip apostolo santiagoPara nós un cole público é un equipamento fundamental nun barrio. No noso, con tan poucos edificios e servizos públicos é un referente basico. Sí, temos outros coles e son benvidos e queridos pois tanto as direccións como as ANPAs participan activamente na nosa vida comunitaria e compartimos idearios e forma de ver o mundo. Pero, ao cabo, son entidades privadas e están suxeitas ás súas propias decisións; que pasaría se decidiran marchar?

Ben sabedes como levamos anos -nós e outras entidades do barrio- nun rexuvenecemento demográfico. Non se trata de botar a ninguén pero é imprescindible atraer xente nova, sangue novo para dar vida ás nosas rúas, ao noso proxecto común e aos nosos negocios.

Xa só por isto é imprescindible un centro público en San Pedro.

Sabedes tamén que o noso cole público de referencia, o CEIP Apóstolo Santiago estivo a piques de desaparecer, teóricamente por falta de alumnado. Cedeuse unha parte do edificio para instalar a Escola Municipal de Música, exactamente o 50%; a metade dereita do plano que adxuntamos; e para acoller aos nenos e nenas dividironse moitas aulas. Como se dí en fútbol, achicaronlle espazo.

Foi o inmenso esforzo das familias e do centro o que permitiu a súa supervivencia e conseguiron invertir a tendencia. Hoxe, cada novo curso, hai máis nenos e nenas e iso é bo para o cole e para o barrio.

Tamén é bo para todo o mundo o proxecto educativo que defende, baseado na integración de nenos e nenas independentemente das súas circunstancias e na riqueza que esa diversidade achega a cativos e cativas e, a través deles, ao conxunto da sociedade. Foi e segue sendo un proxecto modélico e un referente na cidade; e todo grazas fundamentalmente ao esforzo e xenerosidade da comunidade educativa.

Por isto vemos hoxe con moita preocupación certas cousas:

  • o alumnado medra e o ano que ven cubriranse os cupos máximos de moitos cursos o que implica que 25 nenos e nenas terán que se acoplar en aulas que agora acollen a menos dunha ducia.
  • as aulas máis grandes teñen arredor de 35 m cadrados e hai algunha -vista por nós- na que caben pouco máis de 10 mesas.
  • que as aulas de infantil apenas permiten espazo para traballar cos cativos e cativas
  • que continua sen existir un patio cuberto e no inverno o recreo faise, simplemente, na aula (seica isto vai mudar)
  • unha parte importantísima do orzamento escolar vaise en pagar a calefacción.
  • boa parte do barrio aínda non está incluída no distrito deste centro de xeito que o colexio de referencia é outro (Sar, Fontiñas)
  • non está clara a convivencia do servizo de comedor (nun edificio anexo, ao outro lado do patio) cos novos locais de ensaio alí construídos; de feito nin está claro que todos os nenos e nenas podan comer sen estar amoreados o curso que ven.

É certo que estas non son novedades e que veñen de lonxe pero isto non é excusa para esquecelas, e preguntamonos:

  • van quedar nenos e nenas do barrio que teñan solicitado praza fóra do cole?
  • que vai pasar cos nenos e nenas que xa están? pasarán o curso amoreados como sardiñas?
  • que vai suceder no futuro?
  • non sería conveniente reformar o mapa escolar deste centro (e, en xeral, da cidade) para que cada quen vaia ao cole máis próximo?

Todo isto foi trasladado á administración (local e autonómica) por nós e pola comunidade escolar e o certo é que aínda que recoñecen o problema o que responden resulta incerto.

Este colexio -que é o grupo escolar máis antigo da cidade- tivo polideportivo, un enorme patio (hoxe comido por edificios municipais), auditorio, espazo de comedor, aulas máis que suficientes, espazo amplo para profesorado e administración e -mesmo no plano orixinal- un museo. Que queda diso? unhas poucas aulas máis ben pequenas, un mini espazo para a dirección e pouco máis.

É evidente que a cidade ten unha débeda con este centro e comunidade educativa. Non se trata de desprazar a Escola Municipal de Música -aínda que nós temos clara a nosa preferencia- pero compren solucións, e dentro do barrio.

Deberes: despois desta reflexión, botade un ollo a este interesante artigo “El cole es vida y la vida es barrio”

 

« Older articles
Newer articles »