A Xuntanza

Queridos socios e socias,
hoxe hai 30 anos que tivo lugar a primeira asamblea de socios desta asociación. Para entón, xa eramos legais e contabamos cuns estatutos; non obstante fora o 14 de xullo cando se constituíu a institución.
Naquela primeira asamblea resultou elixido como presidente Alfonso Gutierrez Buján; tamén se nomearon vicepresidente, vogais e outros cargos.
Os nosos trinta anos están recollidos nos libros de actas que son tamén testemuño máis importante da nosa historia. Da súa lectura, podemos aprender moito non só sobre o valor do traballo ben feito e da xenerosidade e compromiso daqueles que nos precederon á fronte da asociación, senón tamén da necesidade de perseverar nos nosos obxectivos.
A nosa historia é tamén a do barrio, a da mellora dos servizos, o crecemento da veciñanza… Unha constante rexistrada xa nos primeiros anos: a necesidade de regular e ordenar o tráfico no barrio.
Antes e agora, preocupación e loita por un mellor barrio.

Novamente o noso barrio ferve no limiar dunha xornada especial. Esta vez os organizadores son os comerciantes da Rúa de San Pedro. Preparan para o próximo día 15 de decembro un acontecemento cultural, social e comercial, unha noite branca no que os comercios desa rúa abrirán até a medianoite.
Pero como non todo vai ser gastar, haberá actividades culturais e de lecer para todos os públicos: teatro para todas as idades no CGAC e unha actuación de cantareiras galego-caboverdianas no Museo do Pobo Galego, que abrirán as súas portas durante a noite. Contacontos na galería Petronio Arte, animación de rúa, alumeado de nadal,… tamén terrazas na rúa para disfrutar -tamén en inverno- das amizades e do barrio.