A Xuntanza

O próximo día 5 de maio (venres) as 5 da tarde realizaremos unha visita guiada á exposición El Retrato Español en el Prado. Del Greco a Goya, organizada pola Fundación Caixa Galicia e o Museo del Prado.
Teremos ocasión de ver máis de perto obras mestras desta grande pinacoteca que agora viaxan polo estado dentro do programa El Prado itinerante.
As persoas interesadas teñen que avisar chamando ao 619 241 653, despois das 4 da tarde.
Verémonos na entrada da Fundación o venres 5 ás 4.50.
Esperámosvos.

O programa das festas do Barrio de San Pedro, que se celebrarán este ano os días 30 de xuño e 1 e 2 de xullo, está xa a piques de se rematar.
Informánnos da Comisión de Festas que nos vindeiros días comezará a recadación de fondos polos establecementos comerciais do barrio e polas casas.
O programa deste ano promete ser tan bo como o das edicións de 2004 e 2005!
As festas do barrio precisan da nosa colaboración, tamén económica.

Hai unhas semanas, Unión Eléctrica-Fenosa sorprendeunos coa construción no xa cativo parque da Trisca dun caseto semisoterrado para un transformador eléctrico. Non contentos con comernos unha parte do parque, o caseto foi elaborado sen ter en conta a súa ubicación nun parque infantil e resulta perigroso para os nenos que alí xogan. Tampouco se molestaron en limpar a zona e recoller os escombros e outros materiais.
A Asociación Veciñal A Xuntanza remitiu un escrito ao concello sobre este asunto, denunciando a perigrosidade desta instalación e a presenza dos materiais da obra en plena rúa. Preguntamos tamén ao Concello porqué motivo permitiuse esta construción e non se obligou a facela soterrada.
Dentro dun tempo a veciñanza solicitará -como ocurre hoxe en día na Rúa do Home Santo- o soterramento desta instalación e para entón, como agora, Fenosa se negará a facelo vendose obrigado o Concello a correr cos gastos.

A partir do próximo mes de maio suspenderánse as clases de Tai Chi

Os próximos días 25 de abril e 2 e 9 de maio continuará no noso local o Curso Resolución de conflictos entre pais/nais e adolescentes que desde hai dúas semanas vimos celebrando. Está organizado pola Vocalía da Muller e ten lugar ás 7 da tarde.

A última idea do Concello para revitalizar a Praza é crear aparcamentos de apoio en zonas cercanas. Unha das rúas afectadas por esta nova ordenación do tráfico será a Rúa do Medio, onde o Concello pretende establecer unha zona de Aparcamento regulado con ORA. Ante a crecente preocupación da veciñanza desa rúa e das adxacentes, A Xuntanza, entregou no Concello un escrito no que quer deixar clara a súa oposición a esta medida, lembrando o Sr. Alcalde e ao Concelleiro de Tráfico o seu compromiso de manter a rúa tal e como está, xa que non é posible -segundo afirman eles- crear nela unha zona de aparcamento exclusivo para residentes. Lembramoslle tamén a carencia de aparcamentos en todo o barrio e, moi especialmente, nas zonas acollidas ao Plan Especial da Cidade de Santiago, onde o interés cultural e histórico dos edificios e do subsolo impiden a construción de aparcamentos soterrados, asi como a obrigación que o Concello ten de proporcionar á veciñanza afectada polo Plan Especial dos mesmos servizos e comodidades das que disfrutan noutras zonas da cidade.
Finalmente, a Xuntanza insiste unha vez máis para que o Concello implemente unha comisión específica formada por técnicos e veciñanza que dea unha solución integral e definitiva ós problemas de tráfico e mobilidade no barrio de San Pedro.