13. Marzo 2016 · Comentarios desactivados en O Barrio é a nosa segunda casa: non o fagas, non o consintas · Categories: A Xuntanza, Actividades, O Barrio

Ao longo desta noite alguén destruíu boa parte do traballo que As da Aghulla instalaron na escaleira da Carricova. Non temos palabras para transmitirvos a súa desolación e non temos cara suficiente para soportar a vergoña propia e allea que agora mesmo sentimos e que sabemos que sentirá moita xente ao pasar hoxe por alí.

Si, xa sabemos que estes feitos son cousa dunhas poucas persoas pero pensamos que é necesario facer unha reflexión colectiva sobre isto e sobre o que cada quen de nós fai. Entendemos que o barrio (e a cidade) son a nosa segunda casa; as nosas rúas e prazas son como unha extensión dos nosos salóns e cociñas pois alí vivimos, alí xogamos, falamos, facemos amizades e construímos as nosas vidas e afectos.

Que di de nós, como persoas e como comunidade, un suceso como este?

Que non nos respectamos o suficiente como persoas e como barrio; que moito falamos de vivir no mellor barrio do mundo pero que no fondo tanto nos ten que sexa un estercoleiro; que nos queixamos das persoas que rouban o que é de todos e todas, sen entender que o respecto ao común comeza polo respecto aos espazos que compartimos pois estragalos supón o custe de arranxalos; que tanto nos ten que as nosas rúas se transformen nun barrio como tantos, anodino e aburrido.

E iso o que somos? o que queremos para o barrio? Pensade nisto cando vedes a alguén tirando un papel nunha xardiñeira, roubando unha planta, mexando nunha esquina, deixando atrás os excrementos da súa mascota ou aparcando nunha beirarrúa.

Se non somos quen de protexer e facer respectar o que é de todos e todas, como pretendemos que os demais nos respecten? con que argumento pedimos a outros, por exemplo, ao concello que pague dos cartos de todos e todas o que nós non somos quen de protexer?

Ademáis, esta instalación da Carricova era unha homenaxe a Maruxa e Coralia Fandiño Ricart, veciñas desta rúa, que aquí mesmo sufriron a opresión dun réxime autoritario que trouxo unha guerra e moita dor e destrución. Que clase de xente somos que non somos quen de acariñar a memoria de quen sufriu polas liberdades que hoxe gozamos? E así como honramos o legado das persoas que viviron no barrio antes ca nós?

Non somos asi. E ti?

Uns datos para rematar esta reflexión:

25 persoas traballaron durante 2 meses para preparar unha instalación de ganchillo; outras tantas traballaron o venres e o sábado para facer a instalación. Foi no seu tempo libre e sen retribución; puxeron o seu tempo e o seu diñeiro, si, pois A Xuntanza non ten cartos para axudalas e só se recibiu unha pequena axuda que non cubriu o 100% do custe dos fíos, táboas, arames e outros materiais.

Neste barrio as cousas son así, hai moita xente que desinteresadamente achega o seu tempo, cartos, saber… polo ben común. É o seu esforzo xeneroso o que permite o traballo das Aghullas, a Feira da Primavera, a Cacharela ou esas festas que tanto vos gustan. Hai tamén unha pequena minoría que non sabe ben vivir en comunidade e destrúe o traballo dos demáis, mexa na porta dunha casa ou rouba as plantas; son xente nova pero tamén maiores e cada quen debería reflexionar e asumir a parte de culpa que lle corresponde, por facelo, por non prevelo ou por consentilo.

É evidente que hai quen non ve que vivir no barrio máis bonito do mundo ten un prezo: respetalo,coidalo e acariñalo.

 

 

 

16. Febreiro 2016 · Comentarios desactivados en Curso de teléfono mobil para maiores · Categories: A Xuntanza, Actividades, O Barrio

Tes unha certa idade e tes inseguridade no manexo do teu teléfono mobil?

Xa tes unha certa destreza pero quererías mellorar?

Achegate ao curso que haberá o día 24 da man das Aulas da Terceira Idade e da Fundación Vodafone España.

Será o mércores 24 deste mes, de 6 a 7.30 da tarde, no noso local.

Aproveita esta oportunidade e trae contigo ás amigas e amigos que vexas que poden aproveitar. Non hai que anotarse.

03. Novembro 2015 · Comentarios desactivados en ACTIVIDADES DO CURSO 2015-16 · Categories: A Xuntanza, Actividades, Uncategorized

E aquí está un ano máis o noso programa de actividades para o curso. Como veredes, manteñense moitas actividades e horarios para permitir a permanencia dos grupos.


Antes de seguir lendo, algunhas cousas importantes:

  • Os grupos comezan o 1 de outubro
  • A matrícula será do 23 ao 30 de setembro (nos días laborables) de 19 a 21h
  • É obrigado matricularse.
  • As actividades son abertas a todas as persoas, se ben as non socias farán unha achega de inscrición de 10 €
  • A inscrición é gratuíta para os socios e socias ao día nas súas cotas (podedes pagalas ao facer a inscrición).
  • Como o noso local segue sen reincorporarse á Rede Municipal de Centros Socioculturais, mantense a achega de 2€ para axuda dos gastos do local.

E este é o programa

1.- BAILE GALEGO: Martes de 20:00 a 21:00 horas* (Iniciación)/ de 21:00 a 22:00 horas* / de 22:00 a 23:00 horas*

Monitor@: Felisa Segade *Prezo a repartir entre cada grupo.

2.- CANTO: Mércores de 10:30 a 11:30 e de 13:00 a 14:00h; Venres de 16:00 a 18:00 horas. Clases individuais.

Monitor@: Paulina Ceremuzynska.

3.- CERÁMICA: Mércores de 19:00 a 20:30 horas – 27 €/mes.

Monitor@: Juana

4.- CROCHET:(ganchillo) Mércores de 20:30 a 22:00 horas – 27 €/mes.

Monitor@: Juana

5.- CORTE E CONFECCIÓN / Arranxos de roupa:Martes 18:00 a 20:00 horas.

Monitor@: Susa Garcia Xoves 18:00 a 20:00 horas – 27 €/mes.

6.- GAITA: Xoves de 20:30 a 22:30 horas – 18 €/mes.

Monitor@: Marcos Varela

7.-KIGONG: Luns de 17:00 a 18:00 horas e Venres de 9:00 a 10:00 horas – 11€/mes.

Monitor@: Maite

8.- IOGA: Luns de 19:00 a 20:30 horas – 17 €/mes.

Monitor@: Maite

9.- PILATES:Luns e Mércores de 9:00 a 10:00 horas, e de 18:00 a 19:00 horas – 22 €/mes.

Monitor@: Maite Sábados de 9:00 a 10.00 horas – 10 €/mes.

10.- LINGUA DE SIGNOS: (Básico-I) Xoves de 17:30 a 19:00 horas.

Monitor@: Galensigna (Básico-II) Xoves de 20:00 a 21:30 horas – 20€/mês.

11.- PANDEIRETA E CANTO: Venres de 18:00 a 19h (Nivel I), de 19:00 a 20:00 horas (Nivel II),

Monitor@: Jara de 20:00 a 21:00 horas (Nível III) – 28 €/mes. (Esta actividade empezase 9 de outubro).

12.- TEATRO:Luns de 21:00 a 23:00 horas – 18 €/mes.

Monitor@: Beatriz Bravo

13.- COIRO (Iniciación): Luns de 20:00 a 21:30h– 30 €/mes.

Monitor@: Fer

 14.-Tamboril – Percusion tradicional:Martes de 20:00 a 21:00 horas (Iniciación); 21:00 a 22:00 horas (Perfeccionamento)

Monitor@: Arantxa 25 €/mes. Esta actividade, impartirase no Centro Sociocultural da Trisca.

.15.- REQUINTA: Venres de 20:30 a 22:00 horas – 20 €/mes.

Monitor@: David

 16.- TEATRO / Monográfico:Sábados (un ao mes)de 10:00 a 14:30 horas – Prezo a repartir entre o grupo.

Monitor@: Nekane

17.-TECNICAS DE BORDADO: Venres de 16:30 a 18:00 horas – 25 €/mes.

Monitor@: Mª Carmen

 18.- DANZA ORIENTAL: Venres de 21:00 a 22 horas – 20 €/mes.

Monitor@: Dajira

19.- MEDITACIÓN: Xoves de 19 a 20:30 horas

Monitor@: Zinnia

 

13. Outubro 2015 · Comentarios desactivados en Sábado 24, Mercado do Caracol · Categories: A Xuntanza, Actividades, O Barrio

Xa en pleno outono, é hora de facer inventario de todo o que temos en bo uso pero que nos sobra ou a lista daquelo que poderíamos comprar se o atoparamos a bo prezo. Temos xa á vista un novo Mercado do Caracol.

Xa sabedes en que consiste: convidamosvos a traer todas esas cousas e a vendelas, regalalas ou cambealas; traede cartos no peto porque haberá boas gangas; aproveitade para visitar os establecementos comerciais da rúa do Home Santo.

 A cita é o sábado 24 de outubro, de 12 a 14h. Sí, mudamos un pouco o horario para non ter que madrugar tanto asi que a caracolada pode comezar a armar o posto a partir das 11h.

Se queres vir e traer a túa casiña, lee con atención estas instrucións e mandanos un email a axuntanza01@gmail.com pero OLLO: anotate antes do xoves 22 ás 22h e lembra que é un mercado de barrio, non admitimos nin artesáns nin negocios que non sexan da rúa.

Atención: Se o prognostico meteoróloxico é de choiva, a actividade será cancelada.Estade atentos/as á web ou Redes Sociais.

23. Setembro 2015 · Comentarios desactivados en 3 de outubro: Un barrio en forma. Xornada de deporte na rúa · Categories: A Xuntanza, Actividades, O Barrio

cartaz do barrio en forma

Hai quen di que hai que facer exercicio e estar en forma. Pero, que é estar en forma?
Ao cabo, redonda é unha forma, e cadrada; e é que mesmo cousas como os macarróns teñen unha certa forma (si, acaracolada). Si, estamos en forma redonda, triangular e mesmo en forma atlética.
Reflexionando sobre estes conceptos e por petición popular decidimos deseñar unha xornada para, como barrio, descubrir este concepto de “estar en forma” (sexa a que sexa).
Será o sábado 3 de outubro de 10 a 14h.

  • Onde?

Na rúa, que é onde facemos todas as cousas importantes neste barrio. Neste caso, na Rúa do Home Santo, que será peonil e estará despexada de coches.

  • Que faremos?

Investigaremos en común que é iso de “estar en forma” cun amplo programa de actividades aberto á toda a veciñanza. Poderemos practicar as nosas disciplinas favoritas ou probar cousas novas; desde logo, botaremos unhas risas e moveremos o esquelete, cada quen segundo as súas ganas e capacidade. Hai un completo programa, con moito para elixir

  • Concretamente?

Haberá ioga, baloncesto, brilé, volei, xogos tradicionais, pilates… mesmo esgrima ou danza oriental. Todo en pequenas dosis de 45 min.

  • Hai que anotarse?

Non, abonda con presentarse, preferentemente con roupa axeitada. Trae compañía, o exercicio en grupo é máis divertido.

Lembrade, sábado 3  a partir das 10h na rúa do Home Santo. Quen dixo medo?

25. Xuño 2015 · Comentarios desactivados en SÁBADO 27 DE XUÑO, ESPAZO CIDADÁN NAS FESTAS DO BARRIO DE SAN PEDRO · Categories: A Xuntanza, Actividades, O Barrio

O Espazo Cidadán é un foro aberto que terá lugar ao longo do sábado 27. É o espazo dedicado dentro das Festas do Barrio de San Pedro a aprender e a repensar o mundo en que vivimos e como podemos transformar colectivamente a nosa realidade. Como o ano pasado, este evento é organizado conxuntamente pola AC do Barrio de San Pedro (AKA Comisión de Festas) e a AV A Xuntanza.

Estrutúrase en 3 bloques: feira de entidades asociativas, mesas redondas temáticas e momentos nos que os micrófonos estarán abertos a aquelas entidades e persoas que queiran proxectar ás súas iniciativas.

Na feira e micros abertos participarán máis dunha ducia de entidades tanto do barrio como doutras zonas da cidade; son de vocación social, cívica e mesmo artística.


As mesas redondas debullarán 3 temas de relevancia para o barrio e a cidade como comunidades en desenvolvemento e propoñense máis como conversas abertas co público que como debates académicos. Tal e como sucedeu o ano pasado, búscase unha aprendizaxe e reflexión colectiva que resulte dinámica e participativa.

O Espazo estará instalado na Praza 8 de Marzo e funcionará das 10 ata as 21h, co seguinte programa:

  • 12-13.30h. Mesa 1: Participación Cidadá. Artellando o común
    • Martiño Noriega (Concello), Agustín Pena (AV Raigame), Rosa Muñiz (Cidadanía)
  • 17-18.30h: Mesa 2: Que fai unha moza coma tí nun lugar coma este? Mulleres no heteropatriarcado
    • Sonia Méndez (directora de cine), Patty Castro (música e impulsora do proxecto Mulleres Kañeras Galegas) e Leticia Jorge (xerenta de AESGAL)
  • 18.30-19h: Micros abertos
  • 19-20.30h: Mesa 3: Rar@s somos tod@s. Vidas Independentes
    • Paula Fernández Suárez (Down Compostela), Anxela López (Foro de Vida Independente), Laura Bugallo (activista), Marisa López (ASPANAES), Rebeca Raso (activista)
  •  20.30-21h: Micros abertos

Haberá unha actividade previa, ás 10h que busca dinamizar o emprendemento no Barrio de San Pedro e crear un pequeño espazo no que emprendedores (presentes e futuros) podan coñecerse e intercambiar experiencias. O obradoiro Emprender no barrio de San Pedro. Emocións e resultados, realizase en colaboración coa Concellaría de Igualdade, Desenvolvemento Económico e Turismo dentro das actividades do programa Santiago Urbana Norte.

18. Xuño 2015 · Comentarios desactivados en Plans para xullo: obradoiro de arranxo de roupa · Categories: A Xuntanza, Actividades

Sabes subir o baixo dun pantalón? arranxar unha cremalleira? facer ese miniretoque que deixará esa prenda tan querida como nova?

Agora tes a oportunidade de mellorar as túas habilidades neste campo; todos os xoves de xullo, de 18 a 20h teremos un obradoiro para aprender a facer os arranxos básicos na nosa roupa.

Podes anotarte enviandonos un email a info@axuntanza.org ou ben chamando ao 660267887 (Susa).

 

Temos tamén outros plans para o verán pois manteránse os grupos de pilates (luns e mércores de 9 a 10 e de 18 a 19h) e é ben posible que haxa algunha outra sorpresa. Prestade atención ás nosas comunicacións en redes sociais.

12. Xuño 2015 · Comentarios desactivados en Día do Barrio 2015, algúns problemas · Categories: A Xuntanza, Actividades, O Barrio

A solicitude de autorización para a celebración dalgunhas das actividades do Día do Barrio xa ten resposta. É negativa -é dicir non podemos facer– as seguintes:

  • instalación da mostra de Urban knitting (si, isto da foto)
  • pintado con tiza ou pintura perecedoira de xogos para viandantes nas prazas
  • pintado con tiza ou pintura perecedoira de xogos e divertimentos para cativ@s nas beirarrúas de Quiroga Palacios (esas que se van reformar xa)

Denegaronse tamén outras dúas actividades máis inocuas:

  • instalación na zona da Churrería dun sinal  de cartón que advertise aos ciclistas que se baixan por San Pedro, terán que facelo a pe. Hai anos que pedimos un sinal oficial e esta intervención era unha forma de seguir reclamando e sensibilizar sobre o asunto.
  • Repintado das varandas dos patíns da Costa do Vedor, para mellorar o aspecto da rúa. É o terceiro ano que queríamos intentar isto (temos a pintura comprada daquela, o permiso da veciñanza)

Todas estas actividades foron autorizadas en anos anteriores sen que houbese problema algún.

O Día do Barrio ao contrario do que pensa moita xente, non é un día de festa, senón unha xornada na que todos e todas facemos algo para que o noso barrio sexa un lugar mellor no que vivir; traballo comunitario, espírito construtivo e construción social na súa mellor expresión. É unha actividade de fondo contido educativo e social: implicar á veciñanza no respecto e coidado dos nosos espazos públicos e na solidariedade coas personas que viven canda nós e teñen dificultades.

Entendemos, e esa é a idea chave promotora da actividade, que todos e todas temos que ter unha actitude proactiva a respecto do barrio e a súa xente e que nin é bo nin conveniente agardar cos brazos cruzados a que alguén solucione os nosos problemas. Nós somos a primeira pedra da construción dun barrio diferente e mellor para todos e todas.

Así as cousas, queremos expresar o noso fondo malestar e, unha vez máis, o noso rexeitamento á forma en que desde o Concello se colabora con este tipo de iniciativas. Pois non entendemos:

  • o cambio nos criterios de autorización
  • a falta de comprensión e apoio a esta actividade e a súa filosofía, que é de apoio ao traballo da administración
  • que a condición para a celebración dos distintos traballos sexa que ao acabar a actividade todo teña que quedar como estaba (?)
  • que o concello “autorice” a recollida de alimentos e material escolar, pois dado que este non é un estado policial o que se faga nos comercios (dentro dunhas marxes) non é competencia do concello

É evidente que non leron a memoria adxunta á petición que explicaba a filosofía do proxecto, as características das actividades e os obxectivos. Ou leron pero non entenderon, vai ti a saber!

En fin, mañá faremos o que se poida. Vemonos ás 10 na Cruz de San Pedro.

 

Aqui tendes o permiso, por se queredes botar unha ollada.

Nota: os gastos derivados desta actividade son a cargo da AV A Xuntanza e a veciñanza (plantas, lá para o ganchillo…) Custe para o Concello= 0€.

 

10. Xuño 2015 · Comentarios desactivados en Día do Barrio: o programa · Categories: A Xuntanza, Actividades, O Barrio, Uncategorized

Este será o programa para esta xornada de traballo comunitario:

  • Obradoiro express de Lingua de Signos (coa colaboración de Galensigna) ás 12 na Cruz de San Pedro.
  • Instalar nos arredores da escaleira da Carricova o xardín das mulleres
  • Recollida de alimentos para o Banco de Alimentos
  • Instalación da mostra de Urban knitting
  • Art Attack de sensibilización sobre a redución da velocidade do tráfico nalgunhas rúas.
  • Recollida material escolar (a prol de colexios do barrio)
  • Posta en marcha no barrio da iniciativa dos “cafés pendentes
  • Bancos lectores (algo así): Pza 8 de marzo, Rúa de San Pedro, Pza da Angustia
  • Inventario e diagnose das árbores do barrio

Agardamosvos, a partir das 10h, na Cruz de San Pedro

28. Abril 2015 · Comentarios desactivados en #Barriosconluzpropia #Queremosfestas · Categories: A Xuntanza, Actividades, O Barrio

Hai agora 12 anos, case todos os colectivos do barrio uníronse nun obxectivo común: crear para San Pedro unhas festas para todos e todas, para coñecernos, para gozar xuntos e para fortalecernos como barrio. Querían que os vellos Estados Unidos estiveran xuntos e xuntos construíran o futuro.

Co tempo as festas medraron, coma nós, e naceu a Feira da Primavera. Cada ano, o esforzo xeneroso e a ilusión da veciñanza fixo posible que o sono se cumprira e que por uns días San Pedro fose, máis que nunca, o mellor sitio do mundo no que vivir ou traballar. Contra a choiva e as dificultades seguimos adiante, todos e todas, porque compartimos o soño dun barrio vivo e con futuro. E así cada día, cada ano.

Isto é posible grazas ao traballo das persoas voluntarias, de quen achega a súa doazón, de quen coloca os carteis no seu negocio, de quen consume nas cantinas ou de quen sae neses días á rúa con ganas de compartir coa veciñanza e amizades. Cada quen, na medida do que pode, colabora e así ten que ser: porque o barrio o facemos todos e todas.

A achega do Concello é básicamente a dos servizos, electricidade máis limpeza e contamos tamén coa amabilidade e dispoñibilidade de moitos funcionarios e funcionarias. Como barrio, pensamos e facemos as nosas festas a costa do noso esforzo e o noso peto, ademais, non o quereríamos doutro xeito.

Agora o Concello decidiu non subministrarnos enerxía eléctrica: seica hai un impedimento legal. Que supón esta decisión? Que non haberá onde conectar equipos de son, focos para alumear a Pza 8 de marzo pola noite ou as neveiras das nosas cantinas.

Nós non queremos nin ilegalidades nin favores políticos, senón aquilo ao que temos dereito como barrio e como cidadanía: un apoio efectivo ás nosas iniciativas e, neste caso, unha solución alternativa. Para isto eliximos cada catro anos xente que nos goberne e para isto contribuímos cos nosos impostos.

Queremos unha solución porque é un problema que afecta ao conxunto de barrios e parroquias da nosa cidade. Quen vai organizar unha cacharela sen un foco para alumear? Quen vai organizar unhas festas sen electricidade para as cantinas?

Si, poderíamos usar xeradores pero porqué repagar o que xa pagamos? Nós xa facemos o máis difícil, que é todo o resto.

Con todo, seguimos confiando no poder das persoas e no seu compromiso cos seus veciños e veciñas, co noso barrio e co noso futuro común. Sabemos que non faltará quen nos bote unha man ou quen dea un enganche de luz; coñecemos a vosa xenerosidade e contamos con ela. Porque vos pensades, coma nós, que todos e todas construímos o noso barrio cada día e con cada iniciativa.

É por isto que tras moito pensalo decidimos seguir adiante coa Feira da Primavera, por respecto ao voso esforzo, ilusión e compromiso, ao traballo dos artesáns e ao futuro dos nosos negocios. Non será unha feira como as outras pero sairemos adiante e o barrio brillará con luz propia.

O desafío será maior para as festas pois a complexidade é infinitamente superior e por tanto, tamén o  é o consumo máis potencia eléctrica necesaria; e porque queremos seguir levando a festa a distintas zonas do barrio. Sen concertos, sen cantina, sen actividades na Trisca, na Angustia ou en Home Santo as festas do barrio non serían aquilo polo que tanto traballamos todos e todas. Non chegamos ata aquí para terminar facendo unhas festas de verbena de megaorquestras, porque ese non é o proxecto que queremos.

Organizar todo iso sería unha tarefa titánica á que, francamente, non podemos comprometernos e na que tampouco sería xusto embarcarvos, cando menos con este panorama, por respecto ao noso proxecto común de barrio e ao traballo ata o de agora desenvolvido por todos e todas.

Para seguir adiante precisamos que outros movan ficha e fagan o seu traballo, que nos faremos o noso.

A todos e todas, grazas por facer de San Pedro o mellor barrio do noso mundo.

 

Asociación Veciñal A Xuntanza + Asociación Cultural do Barrio de San Pedro (Comisión de Festas)