27. Abril 2017 · Comentarios desactivados en Construíndo o maio, creamos barrio · Categories: A Xuntanza, Actividades, O Barrio

A primavera chegou e aínda non o celebramos?

Neste barrio si. Imos recibila como se merece, porque queremos darlle a benvida á luz, ás cores, ao florecer… cun xuntarse e desfrutar, cunha actividade que nos permita tamén vernos e colectivamente, facer barrio.

“Construíndo maios, creamos barrio”. Isto é o que vos propoñemos.

Despois da marabillosa experiencia de montar un maio entre todxs o ano pasado, acompañadxs de cadenetas de ovos e pampullos, co recendo de laranxa… non nos resistimos e este ano volvemos reunirnos para construír un novo maio, para crear novas conversas, novos espazos, novas risas, mentres facemos barrio e estreitamos lazos.

O plan que vos propoñemos:

 5 de maio: 17h, Cruz de San Pedro

Este día encantaríanos que vos animásedes e que nos acompañásedes a recoller o material fundamental e necesario para crear este maio colectivo. Non nos cansaremos de dicilo, pero é un día ideal para gozar da natureza entre peques e maiores, de relacionarnos, de descubrir lugares da concello, de pasar un bo rato de maneira divertida e diferente.

Se te animas a vir, podes e tes, trae guantes, tesoiras e similar. Se non tes, non te preocupes e vén igual, levamos nós material para poder recoller todo o que precisamos.

6 de maio: 10h, Cruz de San Pedro

Se te perdiches a oportunidade de participar na recollida de material o venres, sen problema. A esta hora volvemos quedar para apañar máis. Anímate!

 

6 de maio: 12h, Cruz de San Pedro

Construímos o noso maio. Comezaremos a montar, a coser pampullos, fiúnchos, ovos e laranxas… Aí estaremos para que te sumes no momento que poidas, para que cosas un rato, para que saúdes, rías, para que te achegues e nos deas conversa, para que veñas e participes como queiras, para que te quedes e pases o día… Para ser parte desta construción, deste crear.

Tamén vos animamos a traer a vosa comida á praza e que compartamos un xantar común, de todxs, para todxs. Un espazo gastronómico distinto

27. Xaneiro 2017 · Comentarios desactivados en As da Aghulla: Proxecto colaborativo para o Día da Muller 2017 · Categories: A Xuntanza, Actividades, Vogalía da muller

Para o próximo Dia da Muller, que será como sabedes o próximo 8 de marzo, As da Aghulla asumen como desafío adornar a praza dese nome que temos no noso barrio. É dicir queren encher de cores a Praza 8 de marzo para o día 8 de Marzo. Queres colaborar?

Como ben sabedes o colectivo As da Aghulla ven traballando desde hai anos en facer do barrio un lugar máis bonito e alegre. Son un grupo de mulleres -veciñas e non veciñas, socias ou non, mozas ou maiores- que acometen conxuntamente proxectos nos que traballan ao longo do ano. O primeiro deste ano xirará arredor do Día da Muller e a praza 8 de marzo.

Aínda que moitos detalles están aínda por perfilar, está claro que:

  • queren encher a praza de cores
  • queren un proxecto aberto a quen quera participar nel, polo que haberá distintas formas de colaborar
  • Queren facer unha pequena homenaxe ás mulleres da cidade, ás nosas nais, avoas, amigas…
  • Haberá quedadas todos os luns a partir das 20h ata o 4 de marzo no Bar Rey (Concheiros) para recoller colaboracións, respostar preguntas, etc.
  • A montaxe da maior parte da decoración terá lugar o día 4 de marzo, sábado.

Os eixos principais do proxecto serán:

  • Elaborar varias mantas en ganchillo ou calceta
  • Preparar unha exposición fotográfica
  • Instalar na praza unha Biblioteca Libre

Así as cousas abren o proxecto á participación das persoas que así o desexen, do barrio ou doutra zona da cidade, asi que podedes:

  • Axudar a facer as mantas, preparando cadrados de ganchillo ou calceta de 30 x 30cm (mellor xustos que demasiado grandes), feitos de lás de calquera cor. Os luns no Rey haberá quedadas para tecer xuntas e para recoller as pezas de quen traballe en casa. O 27 de febreiro será o último día de recollida de cadrados.
  • Enviando as vosas fotografías de mulleres, das vosas nais, avoas, heroínas ou de vos mesmas, coas vosas amigas, en situacións cotiás (traballando, paseando, pasando un bo rato…). Serán impresas en tamaño A4 así que mirade que teñan calidade razoable. Poden levar un título ou explicación, que debe ser curta, xa que irá sobreimpresionada na imaxe no momento de preparala para a expo. O luns 6 de febreiro será o último día de recollida de fotos, que deben enviarse a axuntanza01@gmail.com.
  • Participar nos obradoiros que no seu momento se organizarán para preparar materiais e para a montaxe.

Pensas que este é o momento de aprender a tecer? As dúas tendas de lás do barrio ofreceren clases e asistencia ténica, están na rúa de San Pedro: Madeixas e Faino tí.

Sempre quixeches participar nestes proxectos pero non vías o momento? Esta é a túa oportunidade.

Tes unhas amigas que ganchillan? pasalles o recado e convidaas, é un proxecto aberto.

En resumo: todos os luns até o 4 de marzo, estarán as Aghullas no Bar Rey a partir das 20h para resolver as vosas dúbidas e achegas.

Colaboran con nós neste proxecto: A Concellaría de Igualdade, Madeixas, Faino tí, o Café Bar Rey.

 

 

 

 

 

11. Xaneiro 2017 · Comentarios desactivados en FEIRA DA PRIMAVERA: COMUNICADO · Categories: A Xuntanza, Actividades

Alá polo 2007 comezou a aventura de organizar a primeira Feira da Primavera: era unha iniciativa conxunta da asociación veciñal, a comisión de festas e o comercio e quería dinamizar o barrio; buscabamos fortalecernos como comunidade, apoiar ao comercio e visibilizar o barrio de San Pedro como espazo no que vivir e traballar. Queriamos ser un barrio mellor, conservar o noso tecido socioeconómico e tecer fíos que nos permitiran medrar de xeito sostible.

O tempo pasou e o esforzo compartido tivo os seus resultados. O que foi unha feira con apenas unha ducia de postos e algúns comercios a pé de rúa é hoxe un evento de primeira orde que congrega a milleiros de persoas e centos de postos. E cumpriu os seus obxectivos: hoxe somos máis fortes como comunidade, como barrio e como espazo económico.

Os logros son innegables pero o futuro presenta novos desafíos e hai luces e sombras que avaliar, ademais de preguntas que responder: Ten futuro un evento que expulsa, polo ambiente e concorrencia da xente, á nosa veciñanza máis querida (maiores e crianzas)? É un botellón masivo unha ferramenta axeitada para facer barrio e crear riqueza? Podemos seguir obviando os problemas de seguridade derivados da  excesiva afluencia? Está contenta a veciñanza coa Feira e todo o que conleva? Que avaliación fan os comercios do eixo comercial San Pedro-Concheiros? A imaxe que proxectamos como barrio nestes últimos anos anima a que recunquen a comprar, abrir negocios ou vivir? É conveniente repensar a Feira e reorientala para que continúe cumprindo a súa función?

É por isto, que a Asociación Cultural do Barrio de San Pedro (Comisión de Festas) e Asociación Veciñal A Xuntanza, como coorganizadoras da Feira da Primavera, decidimos facer un pequeno alto. Hai moito que pensar e repensar, decisións que tomar sen perder de vista os obxectivos de partida: facer barrio e medrar como comunidade.

Non é un punto e final, cando menos neste momento, senón unha parada para coller folgos e reimaxinar o futuro. Seguiremos traballando e avanzando en novas propostas, algunhas das cales verán luz este mesmo ano; non substituirán á Feira pero confiamos en que sirvan tamén para darlle a benvida á primavera, para recoñecérmonos tras o inverno e pasar un bo rato en agradable compañía.

Vémonos daquela… ou nos distintos eventos ó longo do ano: Mercado do Caracol, Día do Barrio ou nas Festas (28 de xuño – 2 xullo neste 2017)

14. Outubro 2016 · Comentarios desactivados en 22 de outubro, Mercado do Caracol · Categories: A Xuntanza, Actividades, O Barrio

Trae a túa casa ás costas ao Mercado do Caracol

Pensamos que estes tempos complicados son perfectos para simplificar as nosas vidas, para interiorizar a práctica dos 3R (reducir, reutilizar e reciclar) e para ser máis solidari@s.

Lembras esa cafeteira en perfecto estado que esmorece nun armario da túa casa? Esa lámpada que realmente nunca conseguiches encaixar na túa sala? E aqueles patíns tan lindos? A bici estatica-percheiro?… Fai inventario, simplifica a túa vida e trae contigo todas esas cousas pois aqui poderás vendelas, trocalas ou mesmo regalalas.

Soñas con renovar a túa mesiña de noite cunha lámpada resultona e eficiente? Gustaríache equipar mellor a túa cociña? Tes grandes proxectos para este curso e precisas accesorios deportivos?… Este é a túa oportunidade.

Que algunha das túas trapalladas é grande? Trae a unha foto e poderás atopar quen o necesite.

Buscas… pero non sabes moi ben que? Leva a túa lista, porque nas nosas casas hai moitas cousas durmindo polas esquinas que mellor estarían noutro fogar.

 … e aínda poderás redescubrir unha zona do barrio e os seus establecementos comerciais. É o día perfecto para facer compras nos negocios desta rúa ou para tomar un bó almorzo

 A cita é o sábado 22 de outubro na Rúa do Home Santo, das 11 ás 14h.

 Se queres vir e traer a túa casiña, lee con atención estas instrucións

01. Outubro 2016 · Comentarios desactivados en PROGRAMA DE ACTIVIDADES 2016-17 · Categories: A Xuntanza, Actividades, Uncategorized

AÍNDA QUEDAN PRAZAS!!

Un ano máis presentamosvos a nosa oferta de actividades para o curso que comeza. Temos propostas tradicionais como baile, corte e confección ou pandeireta pero tamén novas ideas como Scrapbooking (personalizar cadernos e albumes), zumba, pintura creativa e danza fusión oriental ou mesmo un obradoiro trimestral para construir a vosa xenealoxía e historia familiar. Non diredes que non hai de sobra e variado!

Os cursos comezarán o 3 de outubro.

Como sempre, cada actividade ten o seu precio, ao que haberá que engadir os 2 € de achega para axudar nos gastos do local (si, seguimos traballando para que volva á Rede de CSC e o Concello se faga cargo).

Hai que matricularse durante a semana que ven e para isto estaremos no noso local de 19 a 21h. Esta matrícula é gratuita para os socios e socias que estean ao día no pago das cotas, para o resto custa 10 €.

Aquí tendes:
1.- BAILE GALEGO Martes de 20:00 a 21:00 horas* (Iniciación) / de 21:00 a 22:00 horas* / de 22:00 a 23:00 horas*
Monitora: Felisa Segade    *Prezo a repartir entre cada grupo.

2.- CANTO Luns de 10:00 – 13:00 horas. Clases individuais.
Monitora: Paulina Ceremuzynska.

3.- CERÁMICA Mércores de 19:00 a 20:30 horas – 27 €/mes.
Monitora: Juana

4.- GUITARRA Luns de 15:30 a 19:30 horas. *Prezo a repartir entre cada grupo
Monitor: Xavier Mugardos

5.- CORTE E CONFECCIÓN / Arranxos de roupa Martes de 18:00 a 20:00 horas.  Xoves de 18:00 a 20:00 horas – 30 €/mes.
Monitora: Susa Garcia

6.- GAITA Xoves de 20:30 a 22:30 horas – 18 €/mes.
Monitor: Marcos Varela

7.- PINTURA CREATIVA Venres de 18:00 a 19:30 horas – 35 €/mes (inclúe materiais)
Monitora: Isabel

8.- IOGA Luns de 19:00 a 20:30 horas – 17 €/mes.
Monitora: Maite

9.- PILATES Luns e Mércores de 9:00 a 10:00 horas, e de 18:00 a 19:00 horas – 22 €/mes.  Sábados de 10:00 a 11.00 horas – 10 €/mes.
Monitora: Maite

10.- LINGUA DE SIGNOS: (Básico-I) Xoves de 20:00 a 21:30 horas.
Monitora: Galensigna

11.- PANDEIRETA E CANTO Venres de 18:00 a 19h (Nível I), de 19:00 a 20:00 horas (Nivel II), de 20:00 a 21:00 horas (Nível III) – 28 €/ mes.
Monitora: Jara

12.- TEATRO Luns de 21:00 a 23:00 horas – 18 €/mes.
Monitora: Beatriz Bravo

13.- COIRO (Iniciación)   Luns de 20:00 a 21:30h – 30 €/mes.
Monitor: Fer

14.- TAMBORIL – Percusion tradicional Martes de 20:30 a 22:00 horas – 25 €/mes.
Monitora: Arantxa  Esta actividade, impartirase no Centro Sociocultural da Trisca.
.
15.- NOVA XOIERÍA  Mércores  de 18:00 a 19:00 horas – 28 €/mes.
Monitora: Juana

16.- ZUMBA Mércores de 21:00 h. – 22:00 h. – 20 €/mes.
Monitora: Pilar

17.- SCRAPBOOKING Mércores de 20:00 h. – 21:30 h. – 25 €/mes.
Monitora: Lucía (Dulces y Saladas)

18.- DANZA FUSION ORIENTAL Martes de 18:30 a 19:30 horas – 15 €/mes.
Monitora: Maika

19.- MEDITACION TRANSCENDENTAL Xoves de 19:00 a 20.30 horas
Monitora: Zinnia Maravell

20.- XENEALOXÍA E HISTORIA FAMILIAR Mércores de 19:00 a 20:00 horas – 20 €/mes (1º Trimestre)
Monitora: Pilar

 

26. Setembro 2016 · Comentarios desactivados en II Día do Barrio en Forma · Categories: A Xuntanza, Actividades, O Barrio

Despois do éxito do ano pasado, temos aquí unha nova edición do Barrio en Forma, xornada do deporte na rúa. A comisión organizadora decidiu tamén que terá, para sempre, unha data fixa: o primeiro sábado de outubro; así retomamos a rutina con maior alegría.

Nesta ocasión temos moitas novidades asi que prestade atención.

A filosofía

Promover hábitos de lecer activo, coñecer mellor a oferta a este respecto do barrio, pasalo ben e dar vida á Rúa do Home Santo, que é un sitio ben chulo. En conxunto, ser un barrio máis en forma.

En forma?

Hai quen di que hai que facer exercicio e estar en forma. Pero, que é estar en forma?
Ao cabo, redonda é unha forma, e cadrada; e é que mesmo cousas como os macarróns teñen unha certa forma (si, acaracolada). Si, estamos en forma redonda, triangular e mesmo en forma atlética. Como barrio podemos ter mellor forma, persoal e colectiva.
Será o sábado 1 de outubro de 10 a 19h.

Haberá parada para xantar, alí ou na casa; tamén para repoñer folgos.

Onde?

Na rúa, que é onde facemos todas as cousas importantes neste barrio. Neste caso, na Rúa do Home Santo, que será peonil e estará despexada de coches.

Que faremos?

Investigaremos en común que é iso de “estar en forma” cun amplo programa de actividades aberto á toda a veciñanza. Poderemos practicar as nosas disciplinas favoritas ou probar cousas novas; desde logo, botaremos unhas risas e moveremos o esquelete, cada quen segundo as súas ganas e capacidade. Hai un completo programa, con moito para elixir

Concretamente?

Haberá ioga, baloncesto, brilé, volei, xogos tradicionais e de rúa, pilates, rugby, urban dance, bodycombat, taekwondo… mesmo esgrima ou danza oriental. Todo en pequenas dosis de 45 min. En breve difundiremos o programa completo.

Hai que anotarse?

Non, abonda con presentarse.Trae compañía, o exercicio en grupo é máis divertido.

Que teño que levar?

Bo humor e intención de descubrir novas propostas. Equipación deportiva (ou máis ou menos).

Algunha sorpresa?

  • Un programa máis amplo con actividades de todo tipo e acaídas a todos os públicos.
  • Novas camisolas.
  • Unha actividade sobre rodas, asi que ide preparando os vosos equipos.

Vémonos o sábado 1  a partir das 10h na rúa do Home Santo e durante todo o día ata as 19h.

05. Xuño 2016 · Comentarios desactivados en Sábado 11 de xuño, Día do Barrio · Categories: A Xuntanza, Actividades, O Barrio

O Día do Barrio é unha xornada especial.

Ese día

  • aprenderemos a compartir e coidar os nosos espazos públicos
  • colaboraremos para mellorar o aspecto das nosas rúas e recunchos
  • e, como  non podía ser menos, pasaremos un bo rato cos nosos veciños e veciñas.

Por que?, porque:

  • O barrio é a nosa casa e nós temos que ser os primeiros en coidalo, no día do barrio e nos outros días do ano; non queremos suplantar aos servizos municipais.
  • Porque somos moi creativ@s e podemos facer cousas moi chulas

A cita será o sábado día 11 de xuño a partir das 11h na Cruz de San Pedro, ata as 14h

Que necesitades?

  • Ganas de traballar
  • Anotarte mandandonos unha mensaxe a info(arroba)axuntanza.org, non porque sexa obrigatorio senón porque asi podemos organizar mellor as tarefas.

Que faremos?

Un pouco de todo, como os anos anteriores, en función da cantidade de xente que participe. Pero desde xa, algunhas ideas que precisan da vosa colaboración e tendes que comezar a traballar nelas:

  • Facer deseños nas beirarrúas e prazas con xogos
  • Recollida de alimentos para o Banco de Alimentos
  • Instalación dunha mostra de Urban knitting
  • e moitas cousas mais
05. Maio 2016 · Comentarios desactivados en O 21 de maio, Mercado do Caracol · Categories: A Xuntanza, Actividades, O Barrio

Trae a túa casa ás costas ao Mercado do Caracol

Pensamos que estes tempos complicados son perfectos para simplificar as nosas vidas, para interiorizar a práctica dos 3R (reducir, reutilizar e reciclar) e para ser máis solidari@s.

Lembras esa cafeteira en perfecto estado que esmorece nun armario da túa casa? Esa lámpada que realmente nunca conseguiches encaixar na túa sala? E aqueles patíns tan lindos? A bici estatica-percheiro?… Fai inventario, simplifica a túa vida e trae contigo todas esas cousas pois aqui poderás vendelas, trocalas ou mesmo regalalas.

Soñas con renovar a túa mesiña de noite cunha lámpada resultona e eficiente? Gustaríache equipar mellor a túa cociña? Tes grandes proxectos para este curso e precisas accesorios deportivos?… Este é a túa oportunidade.

Que algunha das túas trapalladas é grande? Trae a unha foto e poderás atopar quen o necesite.

Buscas… pero non sabes moi ben que? Leva a túa lista, porque nas nosas casas hai moitas cousas durmindo polas esquinas que mellor estarían noutro fogar.

 … e aínda poderás redescubrir unha zona do barrio e os seus establecementos comerciais. É o día perfecto para facer compras nos negocios desta rúa ou para tomar un bó almorzo

 A cita é o sábado 21 de maio na Rúa do Home Santo, das 11 ás 14h.

 Se queres vir e traer a túa casiña, lee con atención estas instrucións

26. Abril 2016 · Comentarios desactivados en Quen poda dicir que é de San Pedro de sempre, que levante a man · Categories: A Xuntanza, Actividades, O Barrio

Hai alguén?
Pois vai resultar que estás un pouco errad@.
Vivimos nun sitio que naceu como cidade no momento exacto en que armaron o asunto do Apóstolo así que, non, ti non es do barrio de toda a vida porque, simplemente, aquí non sempre houbo vida e ademais, non había ninguén. O mesmísimo Cristovo Francés -o eremita que fundou a capela da Angustia aló polo século XV- era, como o seu nome indica, de orixe gala.

Se observamos os planos antigos -coma este que achegamos de 1796- é aínda máis evidente: o barrio e as nosas rúas foron conformándose co paso do tempo, a medida que as xentes foron chegando doutras zonas da cidade, doutros pobos, doutras terras. É así como medrou o barrio en tempos remotos e medievais pero tamén hai 40 anos, cando as nosas persoas maiores chegaron do Pino, Arzúa ou Melide e tomamos aire de cidade, ou hoxe, cando a xente máis nova chega de todos os recantos do mundo.

Non foi en van que nos chamaron, noutro tempo, Os Estados Unidos. Somos o resultado dunha fusión, da mestura de xentes de diferente orixe: mulleres e homes, rural e urbano, da contorna ou de terras afastadas. O que uniu ás persoas que viviron aquí antes que nós – e o que nos une hoxe – é outra cousa, non é un pasado común senón o desexo de construír un futuro. Será porque vivimos na fronteira ou porque somos como o socalco -conformado por capas que se van pousando-, que somos un tanto cosmopolitas, tendentes á autoxestión, algo descreid@s, ás veces brav@s, cun forte sentimento identitario e dad@s a mirar cara adiante e non cara atrás. Igual nesta mestura está a explicación de todo.
O que nos dá forma, mentres vivimos neste barrio, é o desexo de pertencer a esta comunidade, nada máis.
Isto ven ao fío do que será o eixe central da Feira da Primavera deste ano: a sensibilización sobre unha acollida cálida e xenerosa a quen busca unha vida mellor fuxindo da guerra, da fame e da opresión ou de quen simplemente necesita cambiar de aires para reconstruír o seu proxecto de vida.

Somos un barrio aberto e, como tal, honrando a memoria de quen viviron aquí antes ca nós, acolleremos a quen queira vir e construír o seu futuro entre nós. Así, tamén, faremos barrio.

 

21. Abril 2016 · Comentarios desactivados en O Concepto Ecovaso · Categories: Actividades, O Barrio

O enorme esforzo organizativo que supón a Feira da Primavera ou as Festas ten unha finalidade específica: fortalecer a nosa pequena comunidade no social, no económico e no cultural para poder afrontar con certas garantías os retos do presente e o futuro.

Queremos un barrio no que se poda envellecer con comodidade, capaz de atraer xente nova que veña a vivir e a traballar, cun comercio próximo e forte, cun patrimonio recoñecido e respectado e unha vida social e cultural viva e alegre.
Non cabe dúbida que os nosos grandes eventos son un puntal fundamental na busca destes propósitos pero tamén é certo que poden converterse nunha importante ameaza.

Por isto hai que pensar nunha Feira e Festas que sexan sustentables a todos os niveis.

Por iso tanto nós, como a Comisión como cada un dos veciños e veciñas temos que pensar tamén no impacto ambiental, entendendo “ambiental” na súa concepción máis ampla.
É nesa clave que se pensa a programación (para todos e todas, con horarios e lugares axeitados) ou se organiza a colocación dos postos (a seguridade primeiro).

Todos e todas contribuímos a sostibilidade das festas cando usamos as papeleiras e baldes para lixo, cando usamos os WCs portátiles que se instalan (e que costan unha pasta), cando moderamos os gritos e cantos nas horas nocturnas (os sons inapropiados chámanse ruidos), cando traemos unha bolsa para gardar as compras que faremos, cando compramos neses días e calquera outro día cousas que non veñen do outro lado do mundo, cando somos amables coa xente que atende postos, negocios e as cantinas… porque sostibilidade significa facer posible que a feira ou a festa poda volver a celebrarse; porque o “ambiente” non é só cousa de prados, montes, ríos e outras cousas ecolóxicas senón tamén as rúas e o “ambiente” social que compartimos.
Máis que nunca, nesas datas hai que exercer aquelo que antes se chamaba “urbanidade”; se a feira ou a festa molesta porque hai mexadas nos portais, cristais rotos nas rúas, plásticos por todas partes, medo a vir con cativs ou persoas maiores ou rollos chungos… o equilibrio sustentable crébase e os obxectivos que buscamos tamén.

E logo tamén está a sostibilidade “clásica”, que aínda que pareza dificil de implementar nestas datas non o é tanto:

  • Adeus plásticos de usar e tirar:  ecovaso=vaso que poda ser reutilizado. Podes compralo aquí, traer o doutros anos ou mesmo baixar da casa unha peza da túa lustrosa vaixela. Trátase de reducir o consumo de plástico e a presenza de cristais rotos na rúa; a nosa experiencia demostra non só que é necesario senón tamén que é posible. O lixo deste tipo descendeu arredor dun 80% desde que comezamos a usalos, asi que trae ou compra o teu vaso e pide a túa consumición nel na cantina e nos bares. Doado!
  • Usas os WCs portátiles, para que os sumidoiros non se enchan con líquidos e produtos varios que contaminan se non son axeitadamente tratados.
  • Usas as papeleiras, contedores…
  • Ves no teu coche e logo non atopas onde aparcar e xa chegas ao barrio con certo mal rollo? hai buses, opcións de coche compartido ou taxi. Se ves de lonxe, aproveita o bono de RENFE (que ademais poderás usar toda a semana).

Que fan os organizadores neste sentido? Nós tamén, como coorganizadores da Feira:

  • vimos a pé (que é, ademais, sanísimo)
  • programamos actividades e horarios para todos os públicos: para que todo o mundo estea contento e non haxa balbordo a altas horas da noite
  • organizamos a feira de xeito que haxa unha circulación fluída de persoas e non se formen, na medida do posible, aglomeracións.
  • instalar colectores de lixo
  • instalar Wcs públicos (na entrada da rúa do Medio pola Pza 8 de marzo e ao fondo da pza do Cruceiro)
  • usar nas cantinas embalaxes reciclables; separación de lixo
  • preferir o producido ou vendido no barrio en toda a cadea de subministración
  • promover o uso do ecovaso (único admitido nas cantinas da comisión e en moitos negocios, búscaos)
  • reducir en toda a organización e difusión o consumo de papel

E tí que vas facer? Sabes iso de pensa en global e actúa en local