A Xuntanza

O Día do Barrio é unha xornada especial.

Ese día

• aprenderemos a compartir e coidar os nosos espazos públicos
• colaboraremos para mellorar o aspecto das nosas rúas e recunchos
• e, como  non podía ser menos, pasaremos un bo rato cos nosos veciños e veciñas.

Por que?, porque:

• O barrio é a nosa casa e nós temos que ser os primeiros en coidalo, no día do barrio e nos outros días do ano; non queremos suplantar aos servizos municipais.
• Porque somos moi creativ@s e podemos facer cousas moi chulas

A cita será o sábado día 13 de xuño a partir das 10h na Cruz de San Pedro, ata as 14h

Que necesitades?

• Ganas de traballar
• Anotarte mandandonos unha mensaxe a info(arroba)axuntanza.org, non porque sexa obrigatorio senón porque asi podemos organizar mellor as tarefas.

Que faremos?

Un pouco de todo, como os anos anteriores, en función da cantidade de xente que participe. Pero desde xa, algunhas ideas que precisan da vosa colaboración e tendes que comezar a traballar nelas:

• Instalar nos arredores da escaleira da Carricova o xardín das mulleres
• Facer deseños nas beirarrúas e prazas con xogos
• Recollida de alimentos para o Banco de Alimentos
• Instalación da mostra de Urban knitting
• Obradoiro rápido de Lingua de Signos (coa colaboración de Galensigna)
• Art Attack de sensibilización sobre a redución da velocidade do tráfico nalgunhas rúas.

Trae a túa casa ás costas ao Mercado do Caracol

Pensamos que estes tempos complicados son perfectos para simplificar as nosas vidas, para interiorizar a práctica dos 3R (reducir, reutilizar e reciclar) e para ser máis solidari@s.

 Lembras esa cafeteira en perfecto estado que esmorece nun armario da túa casa? Esa lámpada que realmente nunca conseguiches encaixar na túa sala? E aqueles patíns tan lindos? A bici estática-percheiro?… Fai inventario, simplifica a túa vida e trae contigo todas esas cousas pois aqui poderás vendelas, trocalas ou mesmo regalalas.

 Soñas con renovar a túa mesiña de noite cunha lámpada resultona e eficiente? Gustaríache equipar mellor a túa cociña? Tes grandes proxectos para este curso e precisas accesorios deportivos?… Este é a túa oportunidade.

 Que algunha das túas trapalladas é grande? Trae a unha foto e poderás atopar quen o necesite.

 Buscas… pero non sabes moi ben que? Leva a túa lista, porque nas nosas casas hai moitas cousas durmindo polas esquinas que mellor estarían noutro fogar.

 … e aínda poderás redescubrir unha zona do barrio e os seus establecementos comerciais.

 A cita é o sábado 30 de maio na Rúa do Home Santo, das 11 ás 14h.

Se queres vir e traer a túa casiña, lee con atención estas instrucións e mandanos un email a axuntanza01@gmail.com pero OLLO: anotate antes do xoves 28 ás 22h.

Atención: Se o prognostico meteoróloxico é de choiva, a actividade será cancelada.Estade atentos/as á web ou Redes Sociais.

Hoxe a Xunta de Goberno municipal, aprobou a adxudicación das obras de arranxo da Avda Quiroga Palacios, obra comprometida en 2007.

Aínda que é, desde hai anos a nosa principal prioridade só agora vemos que a cousa se move en serio. Non era sen tempo.

A veciñanza tivo ocasión de velo e de trasladarlle á concelleira as súas inquedanzas sobre el; nós tamén, unha e outra vez pero non fumos quen de convencela. E isto, tanto polas formas (para que tanto falar) como polo fondo (o proxecto é problemático) parecenos inadmisible.

Por este motivo, decidimos enviar unha nota aos principais grupos que se presentan ás eleccións municipais xa que algún deles será o que teña que xestionar a obra e o noso descontento. Así, mandamos este email ás agrupacións locais do PSOE, BNG e Compostela Aberta; o mail do PP non o atopamos, pero mandaremos recado ao alcalde a través das Redes Sociais.

Compañeiros e compañeiras,
Supoño que xa saberedes que hoxe foi anunciada a licitación do arranxo da avda Quiroga Palacios; levamos anos loitando pola renovación desa rúa; de feito é a única obra que pedimos reiteradamente desde 2011.
Queremos poñer en voso coñecemento, o seguinte:

• Sobre o proxecto inicial, nós plantexamos diversas melloras necesarias e forzamos unha reunión coa concelleira na que a veciñanza foi informada e fixo propostas de mellora.
• As nosas propostas iniciais (tendes o enlace abaixo) foron reformuladas despois do encontro entre a concelleira e a veciñanza en dúas propostas básicas:
• manter o estacionamento no tramo do Seminario pois parecenos enormemente gravosa que unha obra neste barrio traia consigo a desaparición do 50% do estacionamento nunha rúa sen preparar unha solución alternativa; e tamén porque entendemos que esa contorna -que está ao carón de dous edificios coa máxima protección do Plan Especial da Cidade- merece un tratamento diferente ao do resto da rúa, algo que podería facerse nun futuro cando se aborde o arranxo definitivo do talude do convento de Belvís e a renovación do inicio da Avenida (ese tramo que queda entre o miradoiro do convento e o Seminario). Abondaría agora con ampliar a beirarrúa todo o que se poda, mantendo o aparcamento.
• instalación de cando menos un colector de lixo soterrado. Para nós é unha cuestión de humanidade nunha rúa notablemente envellecida. A ordenanza municipal deixa claro o horario no que podemos baixar o lixo aos contedores verdes. Obrigar a persoas maiores a baixar 2, 3 ou 4 pisos sen ascensor pola noite só para botar o lixo parecenos algo falto de toda consideración cara a esas persoas; son veciños e veciñas nosas e merecen o noso respecto e apoio. Queremos que os nosos maiores queden aquí e temos que axudarlles.

Non entendemos o proceder do goberno municipal neste asunto e, desde logo, non compartimos a toma de decisións unilaterais nestes aspectos. Agardamos que tomedes nota e que a próxima lexislatura todos e todas implementedes formas de goberno nas que a opinión da veciñanza conte porque, sen veciños e veciñas non hai cidade.

Saúdos cordiais
AV A Xuntanza

Algúns enlaces:

O noso posicionamento sobre o proxecto de obra
Reunión mantida coa concelleira en novembro de 2014
Reunión mantida coa concelleira en febreiro de 2014
Reunión mantida co Alcalde, Sr. Currás en novembro de 2012
Reunión con diversos concelleiros, decembro de 2011

A decisión do concello de non subministrar enganches eléctricos á Feira da Primavera e outros eventos veciñais, pode xustificarse por razóns de seguridade. O que non é comprensible é que non se busque unha solución; seica é unha decisión tomada hai meses, que se fixo neste tempo? Agardar a ver se nós arranxabamos? Porqué ten que soportar o barrio tamén este gasto?

Fartas da situación, solicitamos ao Concello a implementación dunha alternativa viable e segura. Tamén entregamos, para o Sr. Alcalde, este escrito:

Benquerido alcalde,

Chegado o mes de marzo, o Barrio de San Pedro prepara a súa Feira da Primavera, as Festas e os distintos eventos que ata o verán dinamizarán a nosa vida social e comercial. Son actividades ben complicadas que saen adiante polo empeño das entidades do barrio e polo esforzo e compromiso dun cento de persoas que traballan voluntariamente e da veciñanza e empresariado que as apoian en todo aquelo que podan precisar. Todos e todas traballamos a reo porque entendemos que é bo para a nosa pequena comunidade desenvolver todas estas actividades pois nos fortalecen como barrio, nos dinamizan como colectivo e dan un apoio especial aos nosos negocios.

Desde sempre pode dicirse que o apoio municipal a estas iniciativas é morno, entendemos que polos “problemas” que ocasionan, salvando á honrosa excepción dos departamentos relacionados coa Promoción Económica. Cada enganche eléctrico, cada peche de rúa, cada ocupación de espazo é algo que tivo que ser pedido e negociado, case rogado e arrincado, como se o barrio estivera organizando algunha cousa clandestina e nos deran o consentimento de tapadillo.

O barrio organiza e financia totalmente a Feira da Primavera, o Mercado do Caracol e mesmo as Festas e estes son eventos que congregan a milleiros de persoas do barrio, da cidade e mesmo de fóra. Non era a nosa intención pero a verdade é esa, e con xenerosidade acollemos a aqueles que -veñan de onde veñan- se achegan aos nosos eventos. O noso barrio, pero tamén a cidade, se beneficia, e moito, dese traballo desinteresado e do esforzo económico.

Sí, esas sardiñas que tanto gostan aos turistas que visitan a nosa cacharela saen do noso peto (neste caso do xa maltreito da Xuntanza) e tamén o pan e a area, pois o Concello só pon a limpeza, as vallas (sempre escasas) e o punto de luz. E non pasa nada, xa que entendemos que os cartos públicos non son para esas cousas, aínda que as cacharelas veciñais sexan un evento cultural e turístico fundamental no calendario da cidade.

O que non entendemos é que non haxa un apoio decidido e efectivo a estas e outras iniciativas. Seguramente noutros barrios pasará o mesmo pero aquí non pode dicirse que non sexamos ben mandados: que deixaron moito lixo na Festa da Primavera do ano pasado, implantamos os ecovasos; que en Concheiros hai tantísimos coches que a grúa tería que comezar pola noite a sacalos para que se poda facer a feira, nós temos reténs toda a tarde para que ninguén vaia aparcando; que hai que sinalizar os itinerarios alternativos, nos buscamos quen poña as sinais; que hai que organizar o tráfico na Cruz para facer a cacharela, alí estamos toda a tarde…

Que obtiñamos a cambio? A posibilidade de desenvolver un proxecto colectivo no que todo o barrio está implicado e do que, ao cabo, toda a cidade se beneficia. Pero para nós, a veciñanza e os nosos negocios son o fundamental; traballamos para eles porque compartimos un compromiso de futuro.

Agora o Concello non vai facilitar os puntos de conexión eléctrica pois seica son inseguros (non será porque non o teñamos avisado). Non seremos nós quen force a ninguén a tomar unha decisión ilegal ou a poñer en risco a seguridade das persoas pero pensamos que si temos dereito a solicitar unha solución.

Con certa dificultade, temos que recoñecer, aceptamos ter que negociar o uso de espazos que son públicos, pois son de todos e todas pero o Concello os administra no ben da comunidade. Tamén aceptamos a necesidade de colaborar en mitigar o trastorno que ocasionan as nosas iniciativas nos servizos municipais, pois non van deixalo todo por vir a atendernos (aínda que tamén vemos que cando o evento o organiza o Concello ou está apoiado por el as cousas son distintas). Pero non comprendemos nin compartimos este desleixo cara a nos e ao noso barrio.

Seica o noso problema é que todo este lío non o organiza o Concello? Queremos pensar que non, pois nós -no noso ámbito- traballamos por unha cidade mellor.

Por isto, non entendemos que o Concello retire, sen alternativa, unha das poucas achegas efectivas como son os enganches eléctricos. Que vai ser o próximo, recoller nós o lixo?

Nós pensamos que o Concello o que debería facer é axudarnos e non poñer trabas. Que non se pode enganchar na rede do alumeado? Pois busquemos unha solución.

Nós cremos que para isto están as institucións, para apoiar ás necesidades das persoas e os colectivos cidadáns, máxime cando desenvolven iniciativas que fortalecen ás comunidades e que están pensadas no ben común. Para iso están os impostos cos que pagamos a técnicos municipais e aos nosos administradores.

Este asunto da electricidade é un problema que afectará a moitas entidades e iniciativas cidadás así que queremos chamarte a unha seria reflexión sobre as decisións tomadas e a que busques unha solución acaída para San Pedro e para as outras iniciativas de barrios e parroquias. Unha cidade viva descansa sobre as iniciativas sociais e o Concello que todos e todas sostemos co noso esforzo debería entender isto.

Na asamblea anual de 2014, os socios e socias reunidos deron o seu refrendo á idea de elaborar un prontuario de ideas para que os partidos políticos as tiveran en conta á hora de elaborar os seus programas.

Estabamos un pouco fart@s de ocurrencias e de ideas e proxectos que, aínda sendo interesantes, non sempre atendían ás prioridades que sinte a veciñanza ou que chocaban frontalmente co proxecto común que compartimos: un barrio aberto, no que todos e todas nos sintamos cómodas e seguras, acolledor cos nosos negocios e que sexa quen de atraer xente nova que compense o progresivo envellecemento; un barrio no que o noso parecer sexa respectado, o patrimonio coidado e ás nosas iniciativas de dinamización económica ou social verdadeiramente apoiadas.

A Xunta directiva recolleu a proposta e preparou un documento no que se resumen as achegas, desexos e inquedanzas expresados por moitos veciños e veciñas ao longo deste ano. Foi refrendado na asamblea correspondente a 2015, celebrada a semana pasada.

Son, en conxunto 19 puntos e un apéndice:

1.- Plan de Mobilidade que atenda á seguridade e accesibilidade; valenos un plan provisional que ordene a mobilidade, o estacionamento, o transporte etc., no barrio. E que se siga. Ningunha obra máis sen estudo da mobilidade posterior no contexto global do barrio. Ningunha obra en Concheiros sen un plan de mobilidade e un estudo comercial.

2.- Un Centro Sociocultural público acorde á actividade do barrio e da súa poboación (c. 10.000h), de xestión compartida. Conversión progresiva do CSC da Trisca no centro de referencia para o proxecto de Barrio Amigable para as persoas maiores.

3.- Un barrio para todos e todas: plan de accesibilidade para o barrio e as vivendas (escaleiras mecánicas, ascensores); Área de Rehabilitación Integral para as contornas de Quiroga Palacios (Puente la Reina, Bispo Teodomiro, Batalla de Clavijo) e Home Santo (Rodríguez de Viguri, Betanzos).

4.- Posta en valor do Parque de Belvís e o seu patrimonio histórico e natural (arranxo de entradas, do mirador, restauración de muros, sinalización, apertura da curtidoría das Trompas cun proxecto de contidos de carácter cultural).

5.- Reinicio, desde cero, do asunto Casa da Xuventude a partir dunha filosofía diferente: exemplariedade da acción municipal, plan global para o parque de Belvís, avaliación das posibilidades…

6.- Apoio ao proxecto comunitario de Barrio Amigable para os Maiores e posta en marcha das accións que se decidan.

7.- O mantemento dos espazos públicos como filosofía. Queremos menos grandes proxectos de obra e máis mantemento e coidado=> plan anual de mantemento de rúas, mobiliario, servizos… que eviten a necesidade de grandes e custosas intervencións.

8.- Cumprimento do PXOM no referido á parcela dotacional da rúa Triacastela (parque infantil cuberto, aparcamento de residentes, escola infantil ou praza).

9.- Cumprimento das promesas feitas ao CEIP Santiago Apóstolo: patio cuberto, seguridade vial na contorna, renovación e modernización da súa estética e infraestruturas,… Revisión do mapa escolar deste centro para que os rapaces/as do barrio o teñan como o seu centro de referencia.

10.- Adaptación do Parque da Trisca á normativa europea (peche, pavimentos…).

11.- Cumprimento e seguimento efectivo dos pregos de condicións das licitacións das empresas de servizos (limpeza, solución de avarías). Tamén das obras e servizos desenvolvidos en espazos públicos por empresas de servizos (gas, telefonía).

12.- Apoio decidido e efectivo ás iniciativas veciñais de dinamización sociocomunitaria ou económica.

13.- Participación efectiva da veciñanza en todos os procesos que teñan que ver co barrio.

14.- Un Plan Especial para o Casco Histórico que limite a turistización da cidade (e do barrio) e que anime a pequenos emprendendores e familias a asentarse na zona e no barrio.

15.- Participación da veciñanza (ou os seus representantes) na redacción da actualización do Plan Especial e nas comisións posteriores -mesmo técnicas- de seguimento.

16.- Integración e mantemento da biodiversidade urbana no barrio.

17.- Supervisión do impacto ambiental (ruidos, vibracións) do tráfico rodado no corredor San Pedro-Concheiros e nas contornas de Santo Antonio e Belvís.

18.- Goberno transparente e participativo: publicación na web municipal das actas e os acordos de comisións como a Asesora de Casco Histórico e dos plenos e dos materiais previos para que a cidadanía poda opinar. Implementación na web municipal dun espazo para dar a coñecer todos os procedementos de exposición pública, con toda a documentación pertinente.

19.- Exemplariedade do goberno municipal no respecto á lingua, á promoción da igualdade, na atención á diversidade, no respecto ao patrimonio, na participación e integración dos maiores, no acceso á vivenda; introdución de criterios éticos e de sostibilidade social e ambiental na contratación pública.

E apéndice: inicio inmediato do arranxo da Avda Quiroga Palacios (comprometida en 2007) e a súa contorna.

Candidat@s, seredes quen de asumir estas propostas?

P.S. Tamén acordamos, visto o reducido aforo do Centro Sociocultural da Trisca, poñer o noso local á disposición dos partidos políticos para que nel se podan celebrar actos informativos ao longo da campaña electoral, aínda que o noso local non é agora público e non temos obriga legal.

Nestes días falase moito de proxectos de obra a executar no barrio nun futuro próximo. Xa sabedes que houbo algunha presentación destes temas do noso interese en espazos fóra do barrio.

Na semana que ven, teremos oportunidade de coñecelas mellor e falar sobre elas.

O luns ás 20.30h, convidamos á Concelleira de Desenvolvemento Urbano Sostible a achegarse ao barrio e falarnos dos proxectos que presentou a semana pasada en Fontiñas: Rúa dos Concheiros, ascensor de Triacastela e estacionamento en Rodríguez de Viguri (debaixo do Conservatorio).

Por outra banda, o mércores ás 18h no CSC da Trisca falaremos da renovación de Campo de San Antonio.

En resumo:

Luns, ás 20.30h no noso local: Concheiros, Triacastela, Aparcamento

Mércores, as 18h no CSC da Trisca: Campo de San Antonio